Post News Media ព័ត៌មានសេដ្ឋកិច្ច សហភាពអឺរ៉ុប ប...

សហភាពអឺរ៉ុប ប្តេជ្ញាបន្តគាំទ្រ ដល់ការអភិវឌ្ឍន៍ច្រើនវិស័យ នៅកម្ពុជា

ចែកចាយបន្ត

សហភាពអឺរ៉ុប បានប្តេជ្ញានៅតែបន្តគាំទ្រដល់ ការអភិវឌ្ឍន៍វិស័យសំខាន់ៗ នៅកម្ពុជា ដើម្បីជម្រុញសេដ្ឋកិច្ចកម្ពុជា ឲ្យកាន់តែរីកចម្រើនបន្ថែមទៀត។ នេះ​បើ​យោងតាមការ​ប្រកាស​​របស់ ​ឯកអគ្គរដ្ឋទូត​សហភាពអឺរ៉ុប ឯកឧត្តម George Edgar នៅ​ក្នុង​សន្និសីទ​សារព័ត៌មាន​​នាថ្ងៃ​សុក្រ​នេះ ។

ចាប់តាំងពីទសវត្សរ៍ ១៩៩០ មក សហភាពអឺរ៉ុប​គឺជា​ដៃគូ​អភិវឌ្ឍន៍សំខាន់​មួយ​​នៅ​ក្នុង​ប្រទេស​កម្ពុជា​ដោយ​បានផ្ដល់​មូលនិធិ​សម្រាប់គាំទ្រដល់គម្រោង​​ផ្សេងៗ​ក្នុង​វិស័យជាច្រើន រាប់តាំងពី​វិស័យអប់រំ និង​វិស័យ​កសិកម្ម ​រហូត​ដល់​ការ​គ្រប់គ្រងហិរញ្ញវត្ថុ និង​ជំនួយ​ពាណិជ្ជកម្ម​ ដែល​បាន​ផ្ដល់​ផល​ប្រយោជន៍​​ដល់​ប្រជាជន​កម្ពុជា​រាប់​លាន​នាក់ ។

ឯកឧត្តមឯកអគ្គ​រដ្ឋទូត ​បាន​មាន​ប្រសាសន៍ថា ខណ:ដែល​ប្រទេស​កម្ពុជា​បាន​វិវត្ត​ខ្លួន​ក្នុង​រយ:កាល ២០ ឆ្នាំ​មក​នេះ ប្រតិភូសហភាពអឺរ៉ុប​នៅ​ក្នុង​ប្រទេស​កម្ពុជា​មាន​វត្តមាន និង​បាន​ដើរ​តួនាទី​សកម្ម​​ក្នុង​ការ​គាំទ្រ​ដល់​ការអភិវឌ្ឍន៍​សេដ្ឋកិច្ច​ កំណែទម្រង់​វិស័យអប់រំ និង​ការ​បោះឆ្នោត ការ​លើក​កម្ពស់​អភិបាល​កិច្ច និង​វិស័យ​កសិកម្ម ដែល​ទាំងនេះ​បានជួយ​លើក​កម្ពស់​ដល់​ការ​រស់​នៅ​របស់ប្រជាជន​ជា​ច្រើនទូទាំង​ប្រទេស។

ជំនួយ​សហប្រតិបត្តិការ​សហភាពអឺរ៉ុប​ផ្ដល់​មក​ឲ្យ​កម្ពុជា​ បាន​កើនឡើង​យ៉ាង​ច្រើន ។ ចន្លោះពី​ឆ្នាំ ២០០២ និង ២០០៤ ជំនួយ​របស់សហភាពអឺរ៉ុប​មាន​ចំនួន​ជិត ៧៥ លាន​ដុល្លារ ដោយ​បាន​កើនឡើង​ដល់ ៤៤៥ លាន​ដុល្លារ​​សម្រាប់​ពីឆ្នាំ ២០១៤-២០២០ ។

បច្ចុប្បន្ន សហភាពអឺរ៉ុប​ គឺជាទីផ្សារ​នាំចេញ​ធំបំផុត​សម្រាប់​ទំនិញ​កម្ពុជា ដែលគិតជា​ទឹក​ប្រាក់មានចំនួន ៤,៥ ប៊ី​លាន​អឺរ៉ូ ​ក្នុងឆ្នាំ ២០១៦ ហើយ​ទំនាក់ទំនង​ពាណិជ្ជកម្ម​នេះ​បាន​បង្កើត​ការ​ងារ​ដល់​មនុស្ស​រាប់ពាន់ រាប់ម៉ឺន​នាក់ ជាពិសេស​ការងារ​សម្រាប់​ស្ត្រី​កម្ពុជា និង​ប្រជាជន​រស់​នៅតាមទីជនបទ ៕