Post News Media ព័ត៌មានសេដ្ឋកិច្ច អាកាសចរណ៍ប៊ីគ...

អាកាសចរណ៍ប៊ីគីនី Vietjet ផ្តល់ជូនសំបុត្រយន្តហោះ «ឥតគិតថ្លៃ» រយ:ពេល ៣ថ្ងៃ

ចែកចាយបន្ត

ក្រុមហ៊ុនអាកាសចរណ៍ប៊ីគីនី Vietjet នឹងផ្តល់ជូននូវសំបុត្រយន្តហោះឥតគិតថ្លៃ ក្នុងរយ:ពេល ៣ថ្ងៃ ដើម្បីអបអរសាទរការដាក់ដំណើរការផ្លូវហោះហើរថ្មីពី ទីក្រុងហាណូយ ទៅកាន់ប្រទេសសិង្ហបុរី និងក្រុងសៀមរាប។
ក្រុមហ៊ុននឹងធ្វើការផ្តល់ជូនសំបុត្រយន្តហោះជាច្រើនលានសំបុត្រក្នុងតម្លៃ ០ដុល្លារ ជូនដល់អតិថិជន ក្នុងចន្លោះម៉ោងពិសេសគឺចាប់ពីម៉ោង ១២ថ្ងៃត្រង់ ដល់ម៉ោង ២រសៀល (ម៉ោងនៅវៀតណាម) ចាប់ពីថ្ងៃទី ៩ ខែឧសភា ដល់ថ្ងៃទី ១១ ខែឧសភា ឆ្នាំ ២០១៧ ដោយលោកអ្នកគ្រាន់តែចូលទៅកាន់គេហទំព័ររបស់ក្រុមហ៊ុន www.vietjetair.com ។

ការផ្តល់ជូនពិសេសនេះ គឺសម្រាប់គ្រប់ផ្លូវហោះហើរអន្តរជាតិពីវៀតណាមទៅកាន់សេអ៊ូល និងប៊ូសាន (ប្រទេសកូរ៉េខាងត្បូង) ហុងកុង កៅសៀង តៃប៉ិ តៃជុង តៃណាន (តៃវ៉ាន់) សិង្ហបុរី បាងកក (ប្រទេសថៃ) កូឡាឡាំពួរ (ប្រទេសម៉ាឡេស៊ី) យ៉ាងហ្គូន (ប្រទេសមីយ៉ាន់ម៉ា) និងសៀមរាប (ប្រទេសកម្ពុជា) សម្រាប់ការធ្វើដំណើរក្នុងចន្លោះថ្ងៃទី ១ ខែសីហា ឆ្នាំ ២០១៧ និងថ្ងៃទី ៣១ ខែធ្នូ ឆ្នាំ ២០១៧។ (មិនគិតបញ្ចូលថ្ងៃឈប់សម្រាក)

ក្រុមហ៊ុនអាកាសចរណ៍ Vietjet ជាក្រុមហ៊ុនអាកាសចរណ៍ដំបូងគេបង្អស់ ក្នុងប្រទេសវៀតណាម ដែលបានប្រតិបត្តិការជាក្រុមហ៊ុនអាកាសចរណ៍ដ៏ថ្មីសន្លាង ជាមួយនឹងតម្លៃថោកសមរម្យ ព្រមទាំងសេវាកម្មដ៏ល្អ ដើម្បីបំពេញតាមតម្រូវការរបស់អតិថិជន។ ក្រុមហ៊ុនអាកាសចរណ៍ Vietjet ជាសមាជិកនៃសមាគមន៍ដឹកជញ្ជូន ផ្លូវអាកាសអន្តរជាតិ International Air Transport Association (IATA) ដែលទទួលបានវិញ្ញាប័នបត្រ បញ្ជាក់ពីការត្រួតពិនិត្យសុវត្ថិភាពនៃប្រតិបត្តិការ IATA Operational Safety Audit (IOSA)។

ក្រុមហ៊ុនអាកាសចរណ៍នេះ ក៏ត្រូវបានដាក់បញ្ចូលទៅក្នុងបញ្ជីនៃ Top 500 Brands ប្រចាំតំបន់អាស៊ីក្នុងឆ្នាំ ២០១៦ ដោយក្រុមហ៊ុនស្រាវជ្រាវទីផ្សារសកលលោក Nielsen និងទទួលបានពានរង្វាន់ “Best Asian Low Cost Carrier” នៅក្នុងការប្រគល់រង្វាន់នៃកម្មវិធី TTG Travel Awards កាលពីឆ្នាំ ២០១៥ ដែលទទួលបានការបោះឆ្នោតគាំទ្រពីសំណាក់អតិថិជន ភ្នាក់ងារទេសចរណ៍ និងប្រតិបត្តិការទេសចរណ៍ទូទាំងតំបន់អាស៊ី។

គួរជម្រាបដែរថា ក្រុមហ៊ុនអាកាសចរណ៍Vietjet មានយន្តហោះចំនួន ៤៥គ្រឿង រួមមានយន្តហោះម៉ូដែល A320s និង A321s ព្រមទាំងប្រតិបត្តិការហោះហើរចំនួន ៣៥០ជើងក្នុងមួយថ្ងៃ ហើយមកដល់សព្វថ្ងៃនេះក្រុមហ៊ុននេះបានដឹកជញ្ជូនអ្នកដំណើរចំនួន ៣៥ លាននាក់៕