Post News Media ព័ត៌មានសេដ្ឋកិច្ច ជិះកម្សាន្ត B...

ជិះកម្សាន្ត Balance Wheel នៅវត្តភ្នំ កន្លះម៉ោង អស់តែ ១ម៉ឺនរៀល

ចែកចាយបន្ត

សាលាក្រុងភ្នំពេញ បានរៀបចំ Balance Wheel ចំនួន ១៤គ្រឿង សម្រាប់ភ្ញៀវទេសចរជិះកម្សាន្ត នៅរមណីយដ្ឋានវត្តភ្នំ ចាប់ពីថ្ងៃនេះទៅ។ នេះបើយោងតាមការឲ្យដឹងពី លោក ប៉ា សុជាតិវង្ស អភិបាលក្រុងភ្នំពេញ។

សម្រាប់តម្លៃនៃការជិះ Balance Wheel គឺកន្លះម៉ោង ១ម៉ឺនរៀល ដោយថវិកា ដែលបានមកនេះ អាចប្រើប្រាស់ជាវិភាគទាន សម្រាប់ការថែទាំ ការសាកថ្ម និងអាចជាជំនួយសប្បុរសធម៌នានា។

បច្ចុប្បន្ន Balance Wheel មានចំនួន ១៤គ្រឿង ទុកឲ្យប្រើប្រាស់នៅវត្តភ្នំចំនួន ១០គ្រឿង និងអាចដាក់នៅទីតាំងផ្សេង ដូចជាវត្តបទុម មាត់ទន្លេ និងកន្លែងកម្សាន្តផ្សេងៗទៀត ហើយបុគ្គលិកសន្តិសុខក៏អាចប្រើប្រាស់បានផងដែរ។

គួរបញ្ជាក់ដែរថា សាលារាជធានីភ្នំពេញ​ បាននិងកំពុងកែប្រែរមណីយដ្ឋានវត្តភ្នំ ឲ្យក្លាយទៅជាតំបន់បេតិកភណ្ឌវប្បធម៌ប្រវត្តិសាស្រ្ត ដែលជាតំបន់គោលដៅដ៏សំខាន់ សម្រាប់ភ្ញៀវទេសចរជាតិ និងអន្តរជាតិ។

តំបន់សួនកុមារវត្តភ្នំពេញ នឹងត្រូវកែលម្អឲ្យស្អាត រួមទាំងបង្កើតសាលាសិល្ប:សូន្យរូប គូរគំនូរ ចម្លាក់ ស្ពាន់ប្រាក់ សម្រាប់លក់ទៅឲ្យភ្ញៀវទេសចរ ដោយស្ថិតក្រោមការគ្រប់គ្រងរបស់មន្ទីរវប្បធម៌ និងវិចិត្រសិល្ប:រាជធានីភ្នំពេញ។

លើសពីនេះទៅទៀត រោងសិល្ប:នៅខាងត្បូងរមណីយដ្ឋាន នឹងត្រូវរៀបចំឲ្យមានការប្រគុំតន្រ្តី ចំរៀងសម័យ ដែលសម្តែងដោយបងប្អូនជនពិការ ដើម្បីឲ្យពួកគេអាចស្វែងរកប្រាក់ចំណូល សម្រាប់ផ្គត់ផ្គង់ជីវភាពបានផងដែរ៕