Post News Media ព័ត៌មានសេដ្ឋកិច្ច ប៉ា សុជាតិវង្...

ប៉ា សុជាតិវង្ស៖ ហេដ្ឋារចនាសម្ព័ន្ធក្រុងភ្នំពេញ គឺសម្រាប់មនុស្ស៥សែននាក់ រថយន្ត១ម៉ឺនគ្រឿង

ចែកចាយបន្ត

ថ្លែងក្នុងពិធីបញ្ចុះបឋមសិលាផ្សារទំនើប Makro កាលពីព្រឹកនេះ លោក ប៉ា សុជាតិវង្ស អភិបាលក្រុងភ្នំពេញ បានលើកឡើងថា កាលពីដើមឡើយ ហេដ្ឋារចនាសម្ព័ន្ធទីក្រុងភ្នំពេញ គឺរៀបចំប្លង់ឡើងសម្រាប់ប្រជាជនប្រហែល ៣សែន ទៅ ៥សែននាក់ និងរថយន្តជាង ១ម៉ឺនគ្រឿងប៉ុណ្ណោះ។

យ៉ាងណាមិញ ទីក្រុងភ្នំពេញនាពេលបច្ចុប្បន្ន មានប្រជាពលរដ្ឋជាង ៣លាននាក់ រថយន្តជាង ៤៧ម៉ឺនគ្រឿង ម៉ូតូជាង ២លានគ្រឿង ដែលធ្វើឲ្យ បញ្ហាស្ទះ ៣ នៅតែបញ្ហាក្តៅ សម្រាប់រាជធានីភ្នំពេញ ពោលគឺ ស្ទះចរាចរណ៍ ស្ទះទឹក និងស្ទះសំរាម។

ទោះបីយ៉ាងណាក៏ដោយ រាជរដ្ឋាភិបាល បាននិងកំពុងខិតខំធ្វើឲ្យទីក្រុងនេះ មានការប្រែប្រួលបន្ថែមទៀត ដោះស្រាយបញ្ហាប្រឈមជាបន្តបន្ទាប់ ដើម្បីឲ្យជីវភាពប្រជាជន កាន់តែប្រសើរឡើង។

លោក ប៉ា សុជាតិវង្ស បានឲ្យដឹងទៀតថា ដើម្បីដោះស្រាយបញ្ហាទាំងអស់នេះ គឺត្រូវការគោលដៅច្បាស់លាស់ ត្រូវការចូលរួមពី វិស័យឯកជន ស្ថាប័នពាក់ព័ន្ធ និងដៃគូអភិវឌ្ឍន៍ ហើយកម្ពុជាពិតជាអាចឆ្លងផុត ក្លាយជា ទីក្រុងមួយពោរពេញដោយភាពរីកចម្រើន និងការអភិវឌ្ឍន៍។

បច្ចុប្បន្ន ទីក្រុងភ្នំពេញ បានពង្រីកភូមិសាស្រ្តផ្ទៃដីដល់ ៦៩២គីឡូម៉ែត្រការ៉េ ផ្នែករដ្ឋបាលមាន ១២ខណ្ឌ និង ១០៥សង្កាត់ ហើយរោងចក្រ សហគ្រាសជិត ១០០០ស្ថាប័ន ផ្សាររដ្ឋមានចំនួន ២៥ផ្សារ និងផ្សារឯកជនមាន ៣២ផ្សារ ដែលក្នុងនោះផ្សារខ្នាតធំ ឬផ្សារទំនើប ទើបតែមាន ២ផ្សារ។

រីឯ ផ្លូវក្នុងក្រុងជាង ១៨០០គីឡូម៉ែត្រ បានកើនឡើងដល់ជាង ២០០០គីឡូម៉ែត្រ ព្រមទាំងពង្រីកទទឹងផ្លូវធំជាងមុនផងដែរ។

យោងតាមផែនការមេតម្រង់ទិសឆ្នាំ ២០៣៥ ទីក្រុងភ្នំពេញ នឹងអភិវឌ្ឍន៍យ៉ាងខ្លាំងនៅ តំបន់ខាងជើងឈៀងខាងលិច គឺនៅតំបន់បឹងពោងពាយ ដែលកំពុងមានការរីកចម្រើនដូចជា លំនៅដ្ឋាន អគារខ្ពស់ៗ ហេដ្ឋារចនាសម្ព័ន្ធ នឹងប្រែប្រួលមុខមាត់យ៉ាងខ្លាំង នាប៉ុន្មានឆ្នាំចុងក្រោយនេះ។

លោកបញ្ជាក់ថា បញ្ហាប្រឈមនៅក្នុងទីក្រុង គឺត្រូវបានដោះស្រាយពី ១ឆ្នាំទៅ ១ឆ្នាំ កាន់តែល្អប្រសើរ តែមិនអាចនិយាយបានថា ទីក្រុងភ្នំពេញ អាចរំដោះខ្លួនបានពីបញ្ហាស្ទះ ៣ នៅឡើយទេ។

គួរជម្រាបដែរថា ផ្សារទំនើប Makro មកពីប្រទេសថៃ ដែលជាមជ្ឈមណ្ឌលចែកចាយផលិតផលបែបបោះដុំ និងមានទីតាំងក្បែរផ្សារទំនើបអ៊ីអនម៉លទី ២ បានសម្ពោធសាងសង់ជាផ្លូវការនៅថ្ងៃនេះ ហើយគ្រោងនឹងបើកដំណើរការនៅក្នុងខែធ្នូ ឆ្នាំ ២០១៧៕

ចែកចាយបន្ត