Post News Media ព័ត៌មានសេដ្ឋកិច្ច ពលករខ្មែរ ធ្វ...

ពលករខ្មែរ ធ្វើការនៅថៃដោយមិនស្របច្បាប់ មានពេល ១៥ថ្ងៃ ដើម្បីចុះឈ្មោះស្របច្បាប់

ចែកចាយបន្ត

កាលពីម្សិលមិញនេះ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ: បានឲ្យដឹងថា រដ្ឋាភិបាលថៃ ពុំមានវិធានការណាមួយ បណ្តេញពលករខ្មែរមិនស្របច្បាប់ ឲ្យចេញពីប្រទេសថៃនោះឡើយ ពោលគឺ ពលករខ្មែរ ត្រូវចុះឈ្មោះ នៅតាមការិយាល័យចុះបញ្ជីពលករបរទេស ឲ្យបានក្នុងរយ:ពេល ១៥ថ្ងៃ ចាប់ពីថ្ងៃទី ២៤ ខែកក្កដា ទៅដល់ថ្ងៃទី ៧ ខែសីហា។

រដ្ឋាភិបាលថៃ នឹងរៀបចំការិយាល័យចុះឈ្មោះ នៅទីក្រុងបាងកក មាន ១០កន្លែង នឹងមាន ១កន្លែង ក្នុងរាល់ខេត្តផ្សេងៗផងដែរ។

យោងតាមតួលេខជំរឿនចុងក្រោយរបស់ភាគីថៃ បានឲ្យដឹងថា ពលករខ្មែរ កំពុងធ្វើការនៅប្រទេសថៃ មាន ១លាន ៥ម៉ឺននាក់ ខណ:ពលករស្របច្បាប់ មានប្រមាណ ៧៥ម៉ឺននាក់ និងមិនស្របច្បាប់ នៅសល់ប្រមាណ ៣០ម៉ឺននាក់ នៅពុំទាន់មានឯកសារស្របច្បាប់។

លោក បានឲ្យដឹងទៀតថា រដ្ឋាភិបាលថៃ បានចេញច្បាប់ថ្មីស្តីពីការងារ ពោលគឺ ពិន័យចំពោះ ម្ចាស់ស្ថាប័នទាំងឡាយណា ដែលប្រើប្រាស់ពលករមិនស្របច្បាប់ និងពិន័យចំពោះ ពលករធ្វើការមិនស្របច្បាប់ដូចគ្នាដែរ ប៉ុន្តែច្បាប់ថ្មីនេះ នឹងត្រូវអនុវត្តនៅថ្ងៃទី ១ ខែមករា ឆ្នាំ ២០១៨។

គួរជម្រាបដែរថា ការបំពេញបែបបទស្របច្បាប់ គឺនៅមានរយ:ពេល ៦ខែ រហូតដល់ថ្ងៃទី ១ ខែមករា ឆ្នាំ ២០១៨ ដោយឡែកសម្រាប់ពលករ ដែលមិនមានឯកសារគ្រប់គ្រាន់ គឺមានរយ:ពេលត្រឹមតែ ១៥ថ្ងៃ សម្រាប់ទៅចុះបញ្ជី យកលិខិតបញ្ជាក់ គឺចាប់ពីថ្ងៃទី ២៤ ខែកក្កដានេះ ទៅដល់ថ្ងៃទី ៧ ខែសីហា៕