Post News Media ព័ត៌មានសេដ្ឋកិច្ច ក្រុមហ៊ុនផ្ទេ...

ក្រុមហ៊ុនផ្ទេរប្រាក់ និងទូទាត់ចល័ត ស្ពីត ផេ ប្រកាសបើកសម្ពោធជាផ្លូវការ នៅថ្ងៃនេះ

ចែកចាយបន្ត

នៅថ្ងៃនេះ ក្រុមហ៊ុន ស្ពីត ផេ ម.ក បានប្រកាសបើកសម្ពោធជាផ្លូវការ ក្រោមអធិបតីភាពដ៏ខ្ពង់ខ្ពស់របស់ លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា និង លោក លឹម សម្បត្តិ ប្រធានក្រុមប្រឹក្សាភិបាលក្រុមហ៊ុន ស្ពីត ផេ ម.ក។

ក្រុមហ៊ុន ស្ពីត ផេ ត្រូវបានបង្កើតឡើងដើម្បីចូលរួមបម្រើដល់ តម្រូវការរបស់អតិថិជន​ដែលត្រូវការសេវាផ្ទេរប្រាក់ ឬទូទាត់ចល័ត ហើយក្រុមហ៊ុនក៏មានគោលដៅច្បាស់លាស់ ក្នុងការពង្រីកអាជីវកម្មទូទាត់ចល័ត ដូចជា ទូទាត់វិក្កយបត្រទូទៅ ដើម្បីសម្រួលដល់ សហគ្រាសខ្នាតតូច និងមធ្យម ជាង ៤សែនសហគ្រាសនៅកម្ពុជាផងដែរ។

លោក លឹម សម្បត្តិ បានមានប្រសាសន៍ឲ្យដឹងថា ការបង្កើតក្រុមហ៊ុននេះឡើង គឺមិនមែនជារឿងចៃដន្យនោះទេ គឺ ក្រុមហ៊ុនបានកំណត់នូវ ចក្ខុវិស័យមួយច្បាស់លាស់គឺ «ភាពច្នៃប្រឌិតខាងបច្ចេកវិទ្យា ដែលធ្វើឲ្យក្រុមហ៊ុន ស្ពីត ផេ ក្លាយជាស្ថាប័ន ដែលផ្តល់សេវាផ្ទេរប្រាក់ និងទូទាត់ចល័តឈានមុខគេមួយនៅកម្ពុជា»។

នាឱកាសនេះ លោកជំទាវ ជា សិរី ក៏បានបង្ហាញសេចក្តីអបអរ និងស្វាគមន៍ដល់ ក្រុមហ៊ុន ស្ពីត ផេ ដែលទទួលបាននូវជំនឿទុកចិត្តពី ធនាគារជាតិនៃកម្ពុជា  ដើម្បីផ្តល់សេវាទូទាត់ហិរញ្ញវត្ថុនៅប្រទេសកម្ពុជា។

លោកជំទាវ បានបន្តថា ការផ្តល់សេវាទូទាត់ហិរញ្ញវត្ថុនៅកម្ពុជា គឺនៅមានកម្រិតនៅឡើយ ពោលគឺ មានតែទីប្រជុំជន និងទីក្រុងប៉ុណ្ណោះ ខណ:វត្តមានរបស់ក្រុមហ៊ុន ស្ពីត ផេ នឹងជម្រុញវិសាលភាពនៃសេវាទូទាត់ហិរញ្ញវត្ថុ ឲ្យកាន់តែទូលំទូលាយ ជាពិសេសទីជនបទ និងទីដាច់ស្រយាល។

គួរជម្រាបដែរថា មកទល់ពេលនេះ មានភ្នាក់ងារជាង ១០០០នាក់ បានទាក់ទងសួរព័ត៌មាន ដែលក្នុងនោះ មានភ្នាក់ងារជាង ២០០នាក់ បានចុះកិច្ចសន្យារួចរាល់ នឹងមានប្រតិបត្តិនៅក្នុង ២២ខេត្តក្រុង ទូទាំងប្រទេសកម្ពុជា៕