Post News Media ព័ត៌មានសេដ្ឋកិច្ច ផ្លូវជាតិលេខ៥...

ផ្លូវជាតិលេខ៥៥ រត់ខ្វាត់ខ្វែងឆ្លងកាត់ភ្នំខ្ពស់ ភ្ជាប់ពោធិ៍សាត់-ថៃ សាងសង់បាន៨៥%

ចែកចាយបន្ត

ផ្លូវជាតិលេខ ៥៥ ដែលជាផ្លូវរត់ខ្វាត់ខ្វែងឆ្លងកាត់ភ្នំខ្ពស់ជាច្រើន តភ្ជាប់ខេត្តពោធិ៍សាត់ទៅប្រទេសថៃ សម្រេចការសាងសង់បាន ៨៥ភាគរយហើយ គិតមកទល់ពេលនេះ។ នេះបើយោងតាមការឲ្យដឹងពី ក្រសួងសាធារណការ និងដឹកជញ្ជូន។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឲ្យដឹងថា គម្រោងសាងសង់ផ្លូវជាតិលេខ ៥៥ ប្រវែងសរុបចំនួន ១៨២+១៦៦គីឡូម៉ែត្រ នឹងចំណាយទឹកសាងសង់ប្រាក់ប្រមាណ ១៣២លានដុល្លារអាមេរិក និងរយ:ពេល ៤២ខែ។

នេះជាលើកទីមួយ សម្រាប់កម្ពុជា ដែលមានផ្លូវឆ្លងកាត់ភ្នំខ្ពស់បែបនេះ ហើយវាត្រូវការបច្ចេកទេសខ្ពស់ក្នុងការសាងសង់ ព្រោះភ្នំខ្ពស់ ត្រូវធ្វើផ្លូវកាត់ចង្កេះភ្នំ ព្រមទាំងធ្វើរបាំងទប់កុំឲ្យបាក់ដីស្រុតទៀតផង។

ផ្លូវថ្មីនេះ ជាប្រភេទផ្លូវ DBST មានទទឹង ៥ម៉ែត្រ គិតចាប់ពីផ្លូវជាតិលេខ ៥ ត្រង់ចំនុច PK ៩១ + ១៥០ តំបន់ក្រវាញរហូតដល់ស្រុកវាលវែង ឃុំថ្មដា ជាប់ព្រំដែនកម្ពុជា-ថៃ មានទិសចរាចរណ៍ ២គន្លង។

គម្រោងនេះ បានបើកការដ្ឋានសាងសង់កាលពីថ្ងៃទី ១២ ខែមីនា ឆ្នាំ​២០១៤ និងគ្រោងបញ្ចប់នៅថ្ងៃទី ១២ ខែកញ្ញា ឆ្នាំ ២០១៨ខាងមុខនេះ។

ផ្លូវជាតិលេខ ៥៥ ជាសសៃឈាមសេដ្ឋកិច្ចមួយយ៉ាងសំខាន់ ក្នុងការតភ្ជាប់ទំនាក់ទំនងសមាហរណកម្មផ្ទៃក្នុង សម្រួលដល់ចរាចរណ៍របស់ប្រជាពលរដ្ឋ និងតភ្ជាប់រវាងកម្ពុជា និងបណ្តាប្រទេសជិតខាង ជម្រុញដល់ការធ្វើពាណិជ្ជកម្មឆ្លងកាត់ព្រំដែន​ ការវិនិយោគ និងការអភិវឌ្ឍន៍ទេសចរណ៍ និងកសិកម្ម៕