Post News Media ព័ត៌មានសេដ្ឋកិច្ច ឆមាសទី១ ឆ្នាំ...

ឆមាសទី១ ឆ្នាំនេះ ទំហំពាណិជ្ជកម្មកម្ពុជា-អាមេរិក កើនដល់ ១.៥ពាន់លានដុល្លារ

ចែកចាយបន្ត

ត្រឹម ៦ខែ ដើមឆ្នាំ ២០១៧នេះ ទំហំពាណិជ្ជកម្មសរុបរវាងកម្ពុជា និងសហរដ្ឋអាមេរិក មានចំនួន ១.៥៤ពាន់លានដុល្លារអាមេរិក កើនឡើង ១៤ភាគរយ បើធៀបនឹងពេលដូចគ្នាកាលពីឆ្នាំមុន។ នេះបើយោងតាមការឲ្យដឹងពី ក្រសួងពាណិជ្ជកម្ម។

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានឲ្យដឹងថា កម្ពុជាកំពុងខិតខំប្រឹងប្រែង បង្កើតច្បាប់ពាណិជ្ជកម្ម និងវិនិយោគនានា ដើម្បីគាំទ្រដល់ការបើកចំហរ​ និងការស្វាគមន៍ ក្នុងការធ្វើការយ៉ាងជិតស្និទ្ធ ជាមួយរាជរដ្ឋាភិបាលអាមេរិក។

ជាលទ្ធផល អាមេរិក នឹងផ្តល់ជំនួយបច្ចេកទេស ទាក់ទងនឹងសុវត្ថិភាពចំណីអាហារ និងការការពារអ្នកប្រើប្រាស់ ដល់ប្រទេសកម្ពុជា ដើម្បីបង្កើនទំនុកចិត្តអ្នកប្រើប្រាស់ ព្រមទាំងផ្តល់ជំនួយបច្ចេកទេសទាក់ទងនឹងកម្មសិទ្ធិបញ្ញា កិច្ចសម្រួលពាណិជ្ជកម្ម និងការអនុវត្តពាណិជ្ជកម្មតាមប្រព័ន្ធអេឡិចត្រូនិចផងដែរ។

ក្នុងឆ្នាំ ២០១៦កន្លងទៅ ទំហំពាណិជ្ជកម្មរវាងប្រទេសទាំងពីរនេះ មានចំនួន ៣.២ពាន់លានដុល្លារអាមេរិក ថយចុះ ៧ភាគរយ បើធៀបនឹងឆ្នាំ ២០១៥។

សហរដ្ឋអាមេរិក ជាទីផ្សារធំបំផុតទី ២ របស់កម្ពុជា សម្រាប់ការនាំចេញសម្លៀកបំពាក់ ស្បែកជើង វាយនភ័ណ្ឌ អង្ករ គ្រឿងសង្ហារឹម សម្ភារ:ក្មេងលេខ ជ័រ កៅស៊ូ ផលិតផលធញ្ញជាតិ សេរ៉ាមិច ឈើ និងសត្វរស់ ចំណីសត្វ។

រីឯការនាំចេញចម្បងរបស់អាមេរិក មកកាន់កម្ពុជាវិញ រួមមាន យានយន្ត គ្រឿងម៉ាស៊ីន ឧបករណ៍វេជ្ជសាស្រ្តនិងអគ្គិសនី វាយនភ័ណ្ឌ ក្រដាស ផ្លែឈើ និងធញ្ញជាតិជាដើម៕

ចែកចាយបន្ត