Post News Media ព័ត៌មានសេដ្ឋកិច្ច បារាំង ស្នើកម...

បារាំង ស្នើកម្ពុជា ជួយអភិរក្សអគារចាស់សល់ពីសម័យបារាំង ទុកសម្រាប់វិស័យទេសចរ

ចែកចាយបន្ត

ឯកអគ្គរាជទូតបារាំង បានជម្រុញឲ្យអាជ្ញាធររាជធានីភ្នំពេញ បន្តជួយអភិរក្ស អគារចាស់ៗ សល់ពីសម័យអាណានិគមបារាំង ដែលមានអត្តសញ្ញាណវប្បធម៌បារាំង ដើម្បីរក្សាទុកជា កេរមរតកវប្បធម៌ និងទាក់ទាញភ្ញៀវទេសចរជាតិ និងអន្តរជាតិ។ នេះបើយោងតាម ទីភ្នាក់ងារសារព័ត៌មានជាតិ។

លោកស្រី Eva Nguyen Bing ឯកអគ្គរាជទូតបារាំងប្រចាំនៅកម្ពុជា បានលើកឡើងថា សំណង់ចាស់ៗសល់ពីសម័យបារាំង គឺជាទីចាប់អារម្មណ៍យ៉ាងខ្លាំង សម្រាប់ភ្ញៀវទេសចរ ព្រោះវាបង្ហាញពី ស្ថាបត្យកម្ម និងគំរូប្លង់បច្ចេកទេសដ៏អស្ចារ្យរបស់បារាំង ដែលមានភាពបន្ស៊ីគ្នាជាមួយស្ថាបត្យកម្មខ្មែរ។

ជាការឆ្លើយតប លោក ឃួង ស្រេង អភិបាលក្រុងភ្នំពេញ បានឲ្យដឹងថា អាជ្ញាធររាជធានីភ្នំពេញ មានផែនការច្បាស់លាស់ ក្នុងការអភិរក្សអគារបេតិកភណ្ឌវប្បធម៌សល់ពីសម័យបារាំង ដោយហាមឃាត់មិនឲ្យវាយកម្ទេចដោយគ្មានច្បាប់អនុញ្ញាត រួមទាំងការតម្រូវឲ្យមានការសាងសង់គោរពតាមរចនាបថដើម នៅពេលចង់សាងសង់ថ្មី។

សំណង់អគារមួយចំនួន ដែលនៅសល់ពីសម័យអាណានិគមបារាំងរហូតដល់សព្វថ្ងៃ នឹងត្រូវបានចាត់ទុកជា រតនភណ្ឌនៃរាជធានីភ្នំពេញ រួមមាន ក្រុមប្រឹក្សាអភិវឌ្ឍន៍កម្ពុជា តុលាការកំពូល វិមានឯករាជ្យ ក្រសួងប្រៃសណីយ៍ និងទូរគមនាគមន៍ បណ្ណាល័យជាតិ សារមន្ទីរជាតិ រតនាគារជាតិ សាលារាជធានីភ្នំពេញ ព្រះបរមរាជវាំង រមណីយដ្ឋានវត្តភ្នំ អគារអង្គការយូណេស្កូ ផ្សារធំថ្មី គេហដ្ឋានឯកជន និងអគារផ្សេងៗមួយចំនួនទៀត៕