Post News Media ព័ត៌មានសេដ្ឋកិច្ច កម្ពុជា អាចរក...

កម្ពុជា អាចរកចំណូលបានយ៉ាងតិច ៥០០លានដុល្លារ ពីប្រេងកាត នៅអណ្តូងអប្សរា ប្លុកA

ចែកចាយបន្ត

លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល បានឲ្យដឹងថា កម្ពុជា អាចនឹងរកចំណូលយ៉ាងតិច ៥០០លានដុល្លារអាមេរិក ពីអណ្តូងប្រេងកាតអប្សរា នៃប្លុក A បើសិនក្រុមហ៊ុន KrisEnergy សម្រេចអភិវឌ្ឍន៍គម្រោងរបស់ខ្លួននោះ។

គួររម្លឹកថា រាជរដ្ឋាភិបាលកម្ពុជា បានចុះកិច្ចព្រមព្រៀងជាមួយ ក្រុមហ៊ុន KrisEnergy សម្រាប់ការអភិវឌ្ឍប្រេងនៅប្លុក A ដែលជាគម្រោងប្រេងកាតទី ១ និងបើកសករាជឲ្យកម្ពុជា ក្លាយជាប្រទេសផលិតប្រេង។

គិតចាប់ពីថ្ងៃទី ២៣ ខែសីហា ឆ្នាំ ២០១៧ ក្រុមហ៊ុន KrisEnergy មានរយ:ពេល ៦០ថ្ងៃ ដើម្បីសម្រេចចិត្តចុងក្រោយ ថានឹងអភិវឌ្ឍន៍គម្រោងនេះឬទេ។

គម្រោងនេះ គឺជាគម្រោងប្រេងកាតទី ១ ហើយ ដែលនឹងជម្រុញឲ្យកម្ពុជា ក្លាយជាប្រទេសផលិតប្រេង និងឈានទៅធ្វើការរុករកបន្ថែមទៀតលើប្លុកប្រេងកាត ដែលនៅទំនេរ ក្នុងចំណោមប្លុកប្រេងកាត ៦ នៅដែនសមុទ្រ និង ១៨ប្លុក នៅដែនគោក។

កិច្ចព្រមព្រៀងនេះ នឹងអនុញ្ញាតឲ្យក្រុមហ៊ុនធ្វើផលិតកម្មលើកទី ១ របស់ខ្លួន គឺជំហាន 1A និង 1B នៃដំណាក់កាលទី ១ នៃប្លុក A។

យោងតាមផែនការអភិវឌ្ឍន៍របស់ក្រុមហ៊ុន តំណក់ប្រេងដំបូងរបស់ជំហាន 1A នឹងផលិតប្រេងដំបូង ក្នុងរយ:ពេល ២ឆ្នាំទៀត គឺនៅចុងឆ្នាំ ២០១៩ ឬដើមឆ្នាំ ២០២០។

លោក ស៊ុយ សែម រដ្ឋមន្ត្រីក្រសួងរ៉ែនិងថាមពល បានឲ្យដឹងថា តាមការប៉ាន់ស្មាន និងរំពឹងទុកសម្រាប់ដំណាក់កាលដំបូង 1A និង 1B គឺអាចមានធនធានប្រេងកាតលើសពី ៣០លានបារ៉ែល ក្នុងរយ:ពេល ៩ឆ្នាំ ដែលអាចឲ្យកម្ពុជា ក្លាយជាប្រទេសផលិតប្រេងឆៅមួយ នាពេលអនាគត។

គួរជម្រាបដែរថា តំបន់កិច្ចសន្យាប្លុក A កម្ពុជា មានទំហំជាង ៣ពាន់គីឡូម៉ែត្រការ៉េ ដែលស្ថិតនៅក្នុងអាងសមុទ្រខ្មែរ ក្នុងតំបន់ឈូងសមុទ្រថៃ មានជម្រៅទឹកចន្លោះពី ៥០ម៉ែត្រ ទៅ ៨០ម៉ែត្រ៕

ចែកចាយបន្ត