Post News Media ព័ត៌មានសេដ្ឋកិច្ច សាលាក្រុងភ្នំ...

សាលាក្រុងភ្នំពេញ គ្រោងបន្ថែមស្ពានអាកាសភ្ជាប់ជាមួយផ្លូវ៦០ម៉ែត្រ នៅច្រមុះជ្រូកក្បាលថ្នល់

ចែកចាយបន្ត

អាជ្ញាធររាជធានីភ្នំពេញ គ្រោងសាងសង់ស្ពានអាកាសមួយកន្លែងទៀត នៅច្រមុះជ្រូកក្បាលថ្នល់ ភ្ជាប់ជាមួយនឹងផ្លូវ ៦០ម៉ែត្រ ដែលជាចំណុចប្រសព្វផ្លូវ ៦០ម៉ែត្រ ផ្លូវព្រះមុនីវង្ស និងផ្លូវ២៧១។

ក្នុងកិច្ចប្រជុំរវាង លោក ឃួង ស្រេង អភិបាលរាជធានីភ្នំពេញ ជាមួយតំណាងក្រុមហ៊ុន OCIC និងអាជ្ញាធរពាក់ព័ន្ធ បានឲ្យដឹងថា ការកែសម្រួលគម្រោងសាងសង់បន្ថែម ស្ពានអាកាស ២ខ្សែ ត្រង់រង្វង់មូលក្បាលថ្នល់ នឹងត្រូវកាត់បន្ថយការស្ថាបនា នៅត្រឹមតែ ១ខ្សែប៉ុណ្ណោះ ដោយរត់ពី ផ្លូវព្រះមុនីវង្ស ឡើងទៅផ្លូវព្រះនរោត្តម។

គួររម្លឹកដែរថា រដ្ឋបាលរាជធានីភ្នំពេញ ធ្លាប់បានគ្រោងស្ថាបនាបន្ថែម ស្ពានអាកាស និងផ្លូវក្រោមដីចំនួន ៤ខ្សែទៀត នៅតំបន់ក្បាលថ្នល់។

ចំពោះគម្រោងស្ពានអាកាស និងផ្លូវក្រោមដី ទាំង ៤ខ្សែនោះ គឺ៖

១. ស្ពានហោះស្របពីលើមហាវិថីព្រះនរោត្តមបត់ឆ្វេង ឡើងភ្ជាប់ទៅស្ពានមុនីវង្សថ្មី

២. ស្ពានតភ្ជាប់ពីស្ពានមុនីវង្សចាស់បត់កោងស្តាំឡើងទៅចាក់អង្រែ

៣. ស្ពានហោះស្របពីលើមហាវិថីព្រះមុនីវង្ស បត់ទៅមហាវិថីព្រះនរោត្តម រួចបត់ស្តាំឡើងស្ពានវិញ

៤. ផ្លូវក្រោមដី ១ខ្សែ មុជក្រោមដីពីចាក់អង្រែ ឆ្ពោះទៅមហាវិថីព្រះមុនីវង្ស។

ចំពោះស្ពានអាកាស មានបណ្តោយចាប់ពី ២២០ ដល់ ២៤០ម៉ែត្រ និងទទឹងចាប់ពី ៥ ដល់ ៧ម៉ែត្រ ហើយផ្លូវមុជក្រោមដី មានបណ្តោយ ៣០៦ម៉ែត្រ៕

ចែកចាយបន្ត