Post News Media ព័ត៌មានសេដ្ឋកិច្ច ចាប់ពីខែមករា ...

ចាប់ពីខែមករា ឆ្នាំ២០១៨ ប្រាក់ឈ្នួលអប្បបរមាកម្មករ កើនដល់ ១៧០ដុល្លារ/ខែ

ចែកចាយបន្ត

ប្រាក់ឈ្នួលអប្បបរមាសម្រាប់កម្មករ ផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ ២០១៨ គឺកើនដល់ ១៧០ដុល្លារអាមេរិក ក្នុងមួយខែ នេះបើយោងតាមសេចក្តីប្រកាសរបស់ ក្រសួងការងារ និងបណ្តុះបណ្តាលវិជ្ជាជីវ:។

សម្រាប់ ប្រាក់អត្ថប្រយោជន៍ផ្សេងៗទៀត ដែលកម្មករនិយោជិត ធ្លាប់ទទួលបាន ត្រូវរក្សាទុកដដែល។

គួររម្លឹកថា សម្រាប់ឆ្នាំ ២០១៧ ប្រាក់ឈ្នួលអប្បបរមា ១៥៣ដុល្លារ ត្រូវបានសម្រេចក្រោយការបោះឆ្នោត ជ្រើសរើសតួលេខ ១៤៨ដុល្លារអាមេរិក ហើយរាជរដ្ឋាភិបាលកម្ពុជា បានសម្រេចបន្ថែម ៥ដុល្លារអាមេរិកទៀត ដែលធ្វើឲ្យប្រាក់ឈ្នួលកម្មករ ឡើងដល់ ១៥៣ដុល្លារអាមេរិក។

ចាប់ពីឆ្នាំ ២០១៩តទៅ កម្មករនិយោជិតទាំងអស់ នឹងទទួលបានប្រាក់ចូលនិវត្តន៍ (ប្រាក់រឺ ត្រែត) ដូចមន្ត្រីរាជការដែរ​ ពោលគឺ ពេលមានកម្លាំងធ្វើការទទួលបានប្រាក់ខែ ហើយពេលចាស់ទៅធ្វើការមិនកើត ក៏មានប្រាក់រឺត្រែតដែរ។

ដើម្បីឲ្យស្របទៅនឹងកំណើនសេដ្ឋកិច្ចរបស់ប្រទេសកម្ពុជា ប្រាក់ឈ្នួលអប្បបរមាកម្មករ ផ្នែកវាយនភណ្ឌ កាត់ដេរ និងផលិតស្បែកជើង នឹងត្រូវដំឡើងរៀងរាល់ឆ្នាំ ដោយមិនរាប់បញ្ចូលប្រាក់បន្ថែមផ្សេងទៀត។

សម្រាប់ស្ត្រីជាកម្មការិនី មានផ្ទៃពោះ អាចឈប់បាន ១៥នាទីមុនម៉ោង និងត្រូវបានផ្តល់ប្រាក់បន្ថែម ១២០ភាគរយ សម្រាប់សម្រួលនៅពេលឆ្លងទន្លេ។

ទន្ទឹមនឹងនេះ​ សាលារាជធានីភ្នំពេញ នឹងផ្តល់សេវាឡានក្រុងសាធារណ: ដោយឥតគិតថ្លៃ រយ:ពេល ២ឆ្នាំ ដល់កម្មករ កម្មការិនីទាំងអស់ ដោយគ្រាន់តែបង្ហាញកាតការងារ។

ជាចុងក្រោយ ចាប់ពីខែមករា ឆ្នាំ ២០១៨ទៅ កម្មករនិយោជិតទាំងអស់ មិនចាំបាច់បង់ថ្លៃ ចំពោះសេវារបស់របបសន្តិសុខសង្គមផ្នែកថែទាំសុខភាពទៀតឡើយ គឺនិយោជក (ក្រុមហ៊ុន) នឹងទទួលរ៉ាប់រងលើចំណាយនេះទាំងអស់៕