Post News Media ព័ត៌មានសេដ្ឋកិច្ច Arakawa វិនិយ...

Arakawa វិនិយោគ៧០លានដុល្លារលើ លំនៅដ្ឋានតម្លៃសមរម្យ បុកគ្រឹះជាផ្លូវការនៅថ្ងៃនេះ

ចែកចាយបន្ត

ក្រុមហ៊ុនជប៉ុន Arakawa បានសម្រេចបោះទុនវិនិយោគ ៧០លានដុល្លារអាមេរិក និងប្រកាសសម្ពោធបើកការដ្ឋានសាងសង់លំនៅដ្ឋានតម្លៃសមរម្យ ២០០០បន្ទប់ កាលពីព្រឹកមិញនេះ ក្រោមអធិបតីភាព ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់​។

គម្រោងលំនៅដ្ឋានបែបខុនដូ ដែលមានតម្លៃសមរម្យ គ្រោងនឹងចំណាយប្រមាណ ៧០លានដុល្លារអាមេរិក សាងសង់ជា ២ដំណាក់កាល ដោយដំណាក់កាលដំបូង ចំណាយ ៤០លានដុល្លារអាមេរិក មានអគារស្នាក់នៅរួម ១០អគារ ចែកជា ៥ប្លុក ដោយក្នុង ១ប្លុក មាន ២អគារ និងមានកម្ពស់ចាប់ពី ១៩ជាន់ ដល់ ២៣ជាន់។

លោក អាឡិច យ៉ាស៊ូម៉ូតូ សហស្ថាបនិកនៃក្រុមហ៊ុន អារ៉ាខាវ៉ា បានឲ្យដឹងថា តម្លៃជាមធ្យមក្នុងមួយយូនីត គឺចន្លោះជាង ២ ទៅ ៣ម៉ឺនដុល្លារប៉ុណ្ណោះ មានទំហំចាប់ពី ២៣ ទៅ ២៤ម៉ែត្រការ៉េ ហើយការសាងសង់នេះ ក្នុងគោលបំណងឲ្យប្រជាជនកម្ពុជា ដែលមានចំណូលទាប និងមធ្យម អាចទិញលំនៅដ្ឋានបែបខុនដូ រស់នៅកណ្តាលទីក្រុង។

លោក អៀង សុធារ៉ា សហស្ថាបនិកនៃក្រុមហ៊ុន អារ៉ាខាវ៉ា បានបញ្ជាក់ផងដែរថា ក្រុមហ៊ុន នឹងចំណាយដើមទុនផ្ទាល់ខ្លួន ដើម្បីសាងសង់លំនៅដ្ឋាននេះឡើង ពោលគឺ មិនយកលុយអតិថិជន មកអភិវឌ្ឍន៍ឡើយ ហើយគម្រោងនេះផងដែរ គ្រោងនឹងចំណាយពេល ៣ឆ្នាំកន្លះ ដើម្បីបញ្ចប់។

គួរជម្រាបថា គម្រោងលំនៅដ្ឋានអារ៉ាខាវ៉ា អភិវឌ្ឍលើផ្ទៃដី ១៣៦៨០ម៉ែត្រក្រឡា ស្ថិតនៅ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ៕

ចែកចាយបន្ត