Post News Media ព័ត៌មានសេដ្ឋកិច្ច នៅឆ្នាំ ២០១៨ ...

នៅឆ្នាំ ២០១៨ ផ្លែស្វាយរបស់កម្ពុជា នឹងបង្ហាញវត្តមាន នៅសាធារណរដ្ឋកូរ៉េ

ចែកចាយបន្ត

នៅឆ្នាំ ២០១៨ខាងមុខនេះ ផ្លែស្វាយរបស់កម្ពុជា នឹងមានក្នុងទីផ្សារកូរ៉េហើយ ខណ:កូរ៉េ នឹងបន្តជម្រុញការវិនិយោគនៅកម្ពុជា រួមទាំងការវិនិយោគក្នុងការធ្វើការកែច្នៃផលិតផលកសិកម្មផងដែរ។ នេះបើយោងតាមការឲ្យដឹងពី គេហទំព័រហ្វេសប៊ុក របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្តម គីម វ៉ុនជីន (Kim Weon-jin) ឯកអគ្គរដ្ឋទូតផុតអាណត្តិ របស់សាធារណរដ្ឋកូរ៉េ ហើយឯកឧត្តម Kim Weon-jin បានជម្រាបជូន សម្តេចតេជោ អំពីវឌ្ឍន:ភាពការងារពាក់ព័ន្ធនឹងផ្លូវជាតិលេខ ៤៨ និងផ្លូវជាតិលេខ ២១ ហើយនឹងការនាំផ្លែស្វាយកម្ពុជាចេញទៅសាធារណរដ្ឋកូរ៉េ។

សម្តេចតេជោនាយករដ្ឋមន្ត្រី បានសម្តែងនូវការរីករាយអបអរសាទរចំពោះ ការនាំចេញផ្លែស្វាយកម្ពុជាទៅកាន់ទីផ្សាររបស់ សាធារណរដ្ឋកូរ៉េ នៅឆ្នាំក្រោយនេះ។

គួររម្លឹកថា ខេត្តកំពង់ស្ពឺ នឹងមានរោងចក្រ សម្រាប់នាំចេញស្វាយកែវល្មៀត ចេញទៅប្រទេសកូរ៉េ និងអឺរ៉ុប ដោយក្រុមហ៊ុន Hyundai Mao Legacy ទទួលទិញស្វាយចំនួន ៥ខេត្តរួមមាន កំពង់ស្ពឺ កំពង់ចាម តាកែវ ពោធិ៍សាត់ និងសៀមរាប។ នេះបើយោងតាមការឲ្យដឹងពីគេហទំព័ររបស់ក្រសួងកសិកម្ម រុក្ខាប្រមាញ់ និងនេសាទ ចេញផ្សាយនៅថ្ងៃនេះ។

លោក ម៉ៅ គន្ធពិសី ប្រធានក្រុមហ៊ុន Mao Legacy ធ្លាប់បានឲ្យដឹងថា ការនាំចេញផ្លែស្វាយ គឺទាមទារនូវគុណភាព សុវត្ថិភាព និងភាពស្រស់ជាចម្បង ត្រូវលាងសម្លាប់មេរោគ និងរៀបចំទុកដាក់វេចខ្ចប់ ដោយរក្សាក្នុងសីតុណ្ហភាពត្រជាក់ល្អមុនពេលនាំចេញ។

លោកបន្តថា ក្រុមហ៊ុនរបស់លោក នឹងជួយកសិករលើបច្ចេកទេសដាំដុះ ណែនាំពីការប្រើប្រាស់ជីធម្មជាតិល្អៗ មិនប្រើប្រាស់ជីគីមីនោះទេ ហើយចំពោះតម្លៃ ក្រុមហ៊ុននឹងកំណត់ឲ្យថេរ ជៀសវាងឡើងចុះតាមទីផ្សារ និងការបន្ទាបតម្លៃពីឈ្មួញកណ្តាល ព្រមទាំងកំណត់ថ្លៃជាថ្មី បើកសិករគោរពតាមការណែនាំ និងស្តង់ដារនាំចេញ។

គួររម្លឹកដែរថា ក្រុមហ៊ុន Mao Legacy គ្រោងនឹងនាំចេញផ្លែស្វាយប្រមាណ ៧ពាន់តោន ដល់ ១ម៉ឺនតោន នៅចុងឆ្នាំ ២០១៧នេះ ទៅកាន់ទីផ្សារកូរ៉េ និងទីផ្សារពិភពលោក៕

ចែកចាយបន្ត