Post News Media ព័ត៌មានសេដ្ឋកិច្ច ជប៉ុន គ្រោងឧប...

ជប៉ុន គ្រោងឧបត្ថម្ភ ១លានដុល្លារ ដាំស្មៅផ្អែម លើផ្ទៃដីជិត ២ពាន់ហិកតា នៅខេត្តបាត់ដំបង

ចែកចាយបន្ត

ភ្នំពេញ: ទីភ្នាក់ងារសហប្រតិបត្តិការអន្តរជាតិជប៉ុន (ចៃកា) គ្រោងនឹងផ្តល់ជំនួយ ១លានដុល្លារអាមេរិក ដល់ មជ្ឈមណ្ឌលកំចាត់មីនកម្ពុជា (CMAC) ដែលសហការជាមួយក្រុមហ៊ុន យ៉ាន់ម៉ា ជប៉ុន គ្រោងដាំស្មៅផ្អែម លើផ្ទៃដីជិត ២ពាន់ហិកតា នៅខេត្តបាត់ដំបង។ នេះបើយោងតាម លោក ហេង រតនា ប្រតិភូរាជរដ្ឋាភិបាល ទទួលបន្ទុកអគ្គនាយកមជ្ឈមណ្ឌលកំចាត់មីនកម្ពុជា បានឲ្យដឹងកាលពីពេលថ្មីៗនេះ។

លោក ហេង រតនា បានឲ្យដឹងទៀតថា ចៃកា គ្រោងនឹងផ្តល់ជំនួយជាទឹកប្រាក់ ១លានដុល្លារអាមេរិក ព្រមទាំងសម្ភារ:បរិក្ខារ សម្រាប់សាកល្បងដាំដំណាំស្មៅរយ:ពេល ២ឆ្នាំ ដែលនឹងមានការចុះអនុស្សរណ:យោគយល់ នាពេលឆាប់ៗខាងមុខនេះ។

ស្មៅផ្អែម ជាប្រភេទស្មៅគ្រាប់នាំមកពីប្រទេសជប៉ុន ដែលដាំមួយលើកអាចច្រូតបាន ៣ដង និងធន់ទៅនឹងការប្រែប្រួលអាកាសធាតុ ហើយទិន្នផលដំណាំស្មៅផ្អែម គ្រោងនឹងផលិតជាចំណីសត្វ សម្រាប់គោសាច់ និងគោយកទឹកដោះ។

លើសពីនេះទៅទៀត វាក៏អាចផលិតជា ស្ករបានដែរ ដែលមានជាតិស្ករប្រហែលពី ៧ ទៅ ១២ភាគរយ ហើយអាចច្នៃជាប្រេងអេតាណុលផងដែរ។

លោក ហេង រតនា បានបញ្ជាក់ថា ដំណាំប្រភេទនេះ ទទួលបានជោគជ័យខ្លាំង នៅបណ្តាប្រទេសជាច្រើននៅលើពិភពលោក ហើយសម្រាប់ដំណាក់កាលដំបូងនៅកម្ពុជា ក្រុមហ៊ុនយ៉ាន់ម៉ា គ្រោងដាំស្មៅផ្អែមរយ:ពេល ៣ឆ្នាំ និងផលិតជាផលិតផលកសិកម្ម សម្រាប់ផ្គត់ផ្គង់នៅលើទីផ្សារកម្ពុជាជាសំខាន់៕

sorghumpicturesorghumcheckoff