Post News Media ព័ត៌មានសេដ្ឋកិច្ច ចំណតរថយន្តបង់...

ចំណតរថយន្តបង់ប្រាក់បែបទំនើប នឹងមានវត្តមាន នៅតំបន់មុខវត្តបទុមវតី

ចែកចាយបន្ត

ភ្នំពេញ: ចំណតរថយន្តបង់ប្រាក់បែបទំនើប នឹងមានវត្តមាននៅតំបន់មុខវត្តបទុមវតី ដែលការវិនិយោគលើអាជីវកម្ម-សេវាកម្មនេះ កំពុងត្រូវបានសិក្សា និងពិនិត្យបន្ថែមដោយសាលារាជធានីភ្នំពេញ។ នេះបើយោងតាមគេហទំព័រហ្វេសប៊ុកផ្លូវការរបស់រដ្ឋបាលរាជធានីភ្នំពេញ ចេញផ្សាយកាលពីម្សិលមិញនេះ។

លោក ប៉ា សុជាតិវង្ស អភិបាលនៃគណ:អភិបាលរាជធានីភ្នំពេញ បានលើកឡើងពី ការវិនិយោគមជ្ឈមណ្ឌលពាណិជ្ជកម្មផ្សារអូឡាំពិក ការវិនិយោគធ្វើអាជីវកម្ម-សេវាកម្មចំណតរថយន្ត ហើយលោកក៏បានជម្រុញមន្ត្រីក្រោមឱវាទ ត្រូវសិក្សាពិនិត្យលើកិច្ចសន្យាជាមួយក្រុមហ៊ុនឯកជនឲ្យបានម៉ត់ចត់ និងពន្លឿនការងារឲ្យបានឆាប់រហ័សផងដែរ។

ការវិនិយោគលើអាជីវកម្ម-សេវាកម្មចំណតរថយន្តបង់ប្រាក់ នឹងត្រូវបានកំណត់តម្លៃដែលសមស្រប និងអាចទទួលយកបានពីគ្រប់ភាគី ព្រមទាំងរៀបចំឲ្យមានសណ្តាប់ធ្នាប់ និងសុវត្ថិភាពក្នុងរយ:ពេលដំណើរការ។

កាលពីខែកក្កដា កន្លងទៅ លោក ប៉ា សុជាតិវង្ស ក៏ធ្លាប់បានបង្ហើបពីការរៀបចំទីតាំងចំណតមួយចំនួន ក្នុងរាជធានីភ្នំពេញដូចជា ចំណុចជុំវិញផ្សាររាត្រី សួនខាងកើតឌ្រីមលេនឌ៏ ផ្លូវស៊ូស្រ៊ុនវត្តបទុមវតី ខាងកើតសណ្ឋាគារសាន់វេ សួនច្បាររូបហង្ស និងទីតាំងនានាជុំវិញវត្តភ្នំជាដើម។

គួរជម្រាបផងដែរថា សាលារាជធានីភ្នំពេញ ក៏កំពុងសាងសង់ចំណតរថយន្តក្រោមដី ដែលមានជម្រៅចុះក្រោម ៣ជាន់ និងអាចដាក់រថយន្តរហូតដល់ ២០០គ្រឿង តែសម្រាប់ថវិកាសាងសង់គម្រោងនេះ មិនទាន់អាចបញ្ជាក់ប្រាប់បាននៅឡើយទេ៕

14568081_1129981313704939_2910306197537187281_n 10426119_1610328219239148_7930436600136503664_n