Post News Media ព័ត៌មានសេដ្ឋកិច្ច សេដ្ឋកិច្ចថៃ ...

សេដ្ឋកិច្ចថៃ អាចរងផលប៉ះពាល់ ក្រោយព្រះមហាក្សត្រចូលទិវង្គត

ចែកចាយបន្ត

ព្រះមហាក្សត្រថៃ Bhumibol Adulyadej បានសោយទិវង្គត កាលពីម្សិលមិញនេះ ដែលធ្វើឲ្យមានមន្ទិលសង្ស័យជាច្រើនថា តើសេដ្ឋកិច្ចថៃនឹងទៅជាបែបណា?

ព្រះមហាក្សត្រ ត្រូវបានចាត់ទុកជា វីរ:បុរសដ៏សំខាន់ ក្នុងការបង្រួបបង្រួមជាតិ ហើយការបាត់បង់នេះ អាចនឹងបង្កជា អស្ថេរភាពនយោបាយ និងហិង្សា ដែលប៉ះពាល់យ៉ាងខ្លាំងដល់សេដ្ឋកិច្ចផងដែរ។

សេដ្ឋវិទូថៃ បានបង្ហាញពីក្តីបារម្ភ ដែលការបាត់បង់នេះ អាចធ្វើឲ្យប្រទេសជួបបញ្ហាចលាចល និងធ្លាក់ក្នុងវិបត្តិសេដ្ឋកិច្ច ព្រោះសេដ្ឋកិច្ចថៃ កំពុងរីកលូតលាស់យឺត និងវិនិយោគទន់ខ្សោយ ដែលអាចធ្លាក់ទៅក្រោមដៃគូប្រកួតប្រជែងក្នុងតំបន់ គឺ ប្រទេសវៀតណាម។

ការរីកលូតលាស់នៃការវិនិយោគគឺ ត្រឹមតែ ៣ភាគរយ ជាង ១០ឆ្នាំមកហើយ ដែលជាអត្រាយឺតជាងគេ ក្នុងតំបន់អាស៊ីអាគ្នេយ៍ នេះបើយោងតាម Capital Economics។

ក្នុងសប្តាហ៍នេះ ទីផ្សារភាគហ៊ុនថៃ ធ្លាក់ចុះ ៥ភាគរយ ហើយរូបិយវត្ថុ បាត ធ្លាក់ចុះ ២ភាគរយ ធៀបនឹងប្រាក់ដុល្លារអាមេរិក ដោយនេះគ្រាន់តែចេញពី ការបារម្ភលើ សុខភាពរបស់ព្រះមហាក្សត្រតែប៉ុណ្ណោះ។

ក្តីបារម្ភទាំងនេះគឺ ភាគច្រើនទាក់ទងនឹងនយោបាយ ដែលថ្នាក់ដឹកនាំបែបប្រជាធិបតេយ្យ ត្រូវបានយោធាទម្លាក់ដោយធ្វើរដ្ឋប្រហារ ហើយអវត្តមាននៃព្រះមហាក្សត្រ ធ្វើឲ្យប្រទេសអាចធ្លាក់ក្នុងសង្រ្គាមស៊ីវិលផងដែរ។

សម្រាប់វិស័យទេសចរណ៍ ដែលមានចំណែកស្ទើរតែ ១០ភាគរយនៃសេដ្ឋកិច្ចថៃ ក៏បានផ្តល់ការងារប្រមាណ ៥.៤លានការងារ ប៉ុន្តែបានរងផលប៉ះពាល់មួយចំណែកធំ ដោយសារភេរវកម្មកាលពីពេលថ្មីៗនេះ ផងដែរ នេះបើយោងតាម World Travel and Tourism Council។

ក្រុមអ្នកវិភាគ Eurasia Group ក៏បានលើកឡើងដែរថា រដ្ឋាភិបាលនឹងចាត់វិធានការ សម្រាប់ព្រឹត្តិការណ៍នេះ មិនមែនចាំតែផ្តល់ព័ត៌មានធម្មតាៗនោះទេ ហើយទីផ្សារនឹងដំណើរការជាធម្មតា ក្រោយ ការតែងតាំងទាយាទឲ្យឡើងគ្រងរាជបន្ត។

បារ ប្រហែលជាត្រូវបិទមួយរយ: ហើយក្រុមហ៊ុនមួយចំនួន អាចនឹងពន្យារពេល រៀបចំព្រឹត្តិការណ៍សំខាន់ៗដូចជា សម្ពោធផលិតថ្មី ដើម្បីយកពេលកាន់ទុក តែអាកាសយានដ្ឋាន ប្រហែលជាមិនផ្អាកដំណើរការនោះទេ ដោយសារប្រទេសថៃ ពឹងផ្អែកខ្លាំងលើវិស័យនេះ។

ជារួម សេដ្ឋកិច្ចថៃ ត្រូវបានរំពឹងថា នឹងរងផលប៉ះពាល់បន្តិចបន្តួច និងក្នុងរយ:ពេលខ្លីតែប៉ុណ្ណោះ តែសភាពការណ៍ អាចនឹងប្រែប្រួលទៅតាមស្ថានភាពនយោបាយ ហើយការបោះឆ្នោតដែលគ្រោងធ្វើឡើងនៅឆ្នាំ ២០១៧ ក៏ត្រូវបានពន្យារដល់ឆ្នាំ ២០១៨ផងដែរ៕