ជើងហោះហើរត្រង់រវាងទីក្រុង Wuxi ខេត្ត Jiangsu ប្រទេសចិន និងខេត្តព្រះសីហនុ ដែលគម្រោងនេះកំពុងស្ថិតក្រោមការចចារ។ នេះបើយោងតាម មន្ត្រីជាន់ខ្ពស់ជនជាតិចិន បានឲ្យទីភ្នាក់ងារសារព័ត៌មានជាតិដឹង កាលពីពេលថ្មីៗនេះ។

រដ្ឋលេខាធិការដ្ឋានអាកាសចរស៊ីវិល បានឲ្យដឹងដែរថា បច្ចុប្បន្នមានជើងហោះហើរត្រង់ចំនួន ១០ រវាងខេត្តមួយចំនួននៅប្រទេសចិន មកកាន់ព្រះរាជាណាចក្រកម្ពុជា ហើយគម្រោងភ្ជាប់ជើងហោះហើរត្រង់មកខេត្តព្រះសីហនុ និងខេត្តសៀមរាបនេះ អាចជាជើងហោះហើរត្រង់ទី ១១ និងទី ១២ រវាងចិន-កម្ពុជា។

កិច្ចពិភាក្សាពីជើងហោះហើរត្រង់នេះ ត្រូវបានលើកឡើងជាមួយគ្នានឹង តំបន់សេដ្ឋកិច្ចពិសេសព្រះសីហនុ ១០០រោងចក្រ កាន់កាប់ដោយក្រុមហ៊ុន Hodo Group ហើយជើងហោះហើរត្រង់នេះ រំពឹងនឹងបើកដំណើរការក្នុងពេលឆាប់ៗនេះ។ នេះបើយោងតាមការលើកឡើងរបស់លោក Wang Jinjian មន្រ្តីជាន់ខ្ពស់នៃក្រុង Wuxi។

លោកបន្តថា រោងចក្រចំនួន ៨៨ កំពុងដំណើរការនៅក្នុងតំបន់សេដ្ឋកិច្ចពិសេសព្រះសីហនុនេះ ហើយជើងហោះហើរត្រង់នេះ នឹងទាក់ទាញវិនិយោគិនចិនមកកម្ពុជាបន្ថែមទៀត ក៏ដូចជាជម្រុញក្រុមហ៊ុនចិន ឲ្យបង្កើតរោងចក្រកាន់តែច្រើននៅកម្ពុជា។

គួរបញ្ជាក់ដែរថា កម្ពុជា រំពឹងទទួលភ្ញៀវទេសចរចិនប្រមាណជិត ១លាននាក់ ត្រឹមដំណាច់ឆ្នាំ ២០១៦នេះ ដែលការកើនឡើងនេះ អាចបង្ហាញពីលទ្ធផលនៃការបន្ថែមជើងហោះហើរត្រង់រវាងប្រទេសកម្ពុជា-ចិនផងដែរ៕