កម្ពុជា បានស្នើដល់ក្រុមហ៊ុន SIEMENS មកពីប្រទេសអាល្លឺម៉ង់ ឲ្យសិក្សាពីឱកាសវិនិយោគលើ សេវាកម្មរថភ្លើងអាកាសនៅកម្ពុជា។ នេះបើយោងតាមគេហទំព័រផ្លូវការរបស់ក្រសួងពាណិជ្ជកម្ម ចេញផ្សាយកាលពីម្សិលមិញនេះ។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានស្នើដល់លោក Markus Lorenzini នាយកប្រតិបត្តិក្រុមហ៊ុន SIEMENS ឲ្យពិនិត្យលទ្ធភាពវិនិយោគបង្កើតសេវាកម្មរថភ្លើងអាកាសនៅកម្ពុជា ដើម្បីកាត់បន្ថយបញ្ហាកកស្ទះចរាចរណ៍ និងដោយសារអាល្លឺម៉ង់ ជាប្រទេសល្បីល្បាញខាងផ្នែកប្រតិបត្តិការរថភ្លើងអាកាស។

លោក ប៉ា សុជាតិវង្ស អភិបាលរាជធានីភ្នំពេញ ក៏ធ្លាប់បានលើកឡើងដែរថា កម្ពុជា អាចនឹងរថភ្លើងលើអាកាសធុនស្រាលស្វ័យប្រវត្តិ ក្នុងពេលឆាប់ៗខាងមុខនេះ ដែលសហការជាមួយជប៉ុន ដើម្បីសាងសង់។

បើយោងតាមផែនការមេស្តីពីប្រព័ន្ធដឹកជញ្ជូនក្នុងក្រុង ឆ្នាំ ២០៣៥ គម្រោងខ្សែរថភ្លើងនេះ អាចនឹងចាប់ផ្តើមក្នុងឆ្នាំ ២០២០ និងបញ្ចប់ក្នុងឆ្នាំ ២០២៣ ដោយគម្រោងដំបូងមានប្រវែង ១៣គីឡូម៉ែត្រ និងចំណាយប្រមាណ ៦០០លានដុល្លារអាមេរិក។

គួររម្លឹកដែរថា ក្រុមហ៊ុន SIEMENS ក៏ជាក្រុមហ៊ុនចំណាស់មួយ ដែលមានវត្តមានលើទីផ្សារអន្តរជាតិប្រមាណជា ១៦៥ឆ្នាំមកហើយ ដែលផ្គត់ផ្គង់ប្រព័ន្ធថាមពលអគ្គិសនី និងផលិតផលអេឡិចត្រូនិក៕