Post News Media ព័ត៌មានសេដ្ឋកិច្ច លំនៅដ្ឋានអូស្...

លំនៅដ្ឋានអូស្រ្តាលីតម្លៃមធ្យម នឹងផ្លាស់ប្តូរវាលស្រែទំនប់កប់ស្រូវ ទៅជាលំនៅដ្ឋាន

ចែកចាយបន្ត

គម្រោងលំនៅដ្ឋានរចនាបថអូស្រ្តាលី តម្លៃក្រោម ៣ម៉ឺនដុល្លារអាមេរិក នឹងផ្លាស់ប្តូរវាលស្រែនៃតំបន់ទំនប់កប់ស្រូវ ទៅជាតំបន់លំនៅដ្ឋាន។ នេះបើយោងតាមលោក Dr. Michael S. Nhim បានឲ្យ Post Business ដឹងនៅថ្ងៃនេះ។

ដោយមើលឃើញពីសក្តានុពលនៃការអភិវឌ្ឍន៍តំបន់ទំនប់កប់ស្រូវ ទៅជាតំបន់កាំកូស៊ីធីទី ២ លោក Dr. Michael S. Nhim នឹងធ្វើឲ្យគម្រោងលំនៅដ្ឋាននេះ ផ្លាស់ប្តូរផ្នត់គំនិតប្រជាជនទីក្រុង ឲ្យមករស់នៅក្នុងតំបន់ទីក្រុងរណបថ្មី ខាងលិចបឹងតាមោក (បឹងកប់ស្រូវ) ហើយលោកសង្ឃឹមថា គម្រោងនេះនឹងស្របតាមគោលនយោបាយអភិវឌ្ឍន៍ទីក្រុងរបស់សាលារាជធានីភ្នំពេញ នឹងរំពឹងទទួលបានការគាំទ្រពីសំណាក់រាជរដ្ឋាភិបាល។

បច្ចុប្បន្ន តំបន់ទំនប់កប់ស្រូវ កំពុងមានការអភិវឌ្ឍន៍យ៉ាងខ្លាំងក្លាដូចជា ការស្ថាបនាផ្លូវបេតុងលេខ ៤២ (ទទឹង ៤០ម៉ែត្រ) ឆ្លងកាត់ពីផ្សារបែកចាន មកដល់ភ្នំបាសិទ្ធ នៅក្បែរតំបន់អភិវឌ្ឍន៍បៃតងរបស់សាលារាជធានីភ្នំពេញ (ខាងលិចបឹងកប់ស្រូវ) ការសាងសង់ទំនប់ពុះកាត់ទទឹងបឹង និងទំនប់ព័ទ្ធជុំវិញបឹងកប់ស្រូវ ដែលបង្កភាពងាយស្រួលដល់ការធ្វើចរាចរណ៍ និងកំណត់តំបន់ស្នូលរបស់បឹង។

លើសពីនេះទៅទៀត គម្រោងអភិវឌ្ឍន៍លំនៅដ្ឋាននេះ ស្ថិតនៅជិតគម្រោងផ្លូវ ៦០ម៉ែត្រ ដែលជាផ្លូវក្រវ៉ាត់ក្រុង តភ្ជាប់ពីស្ពានលីយ៉ុងផាត់ ផ្លូវជាតិលេខ ៥ ទៅតំបន់ជម្ពូវ័ន ផ្លូវជាតិលេខ ៤ផងដែរ។

ក្រុមអ្នកវិនិយោគរបស់ Cate Group ដែលមានចម្រុះជាតិសាសន៍ខ្មែរ អូស្រ្តាលី មានគម្រោងធ្វើការសាងសង់ផ្ទះ ១ពាន់ខ្នងដំបូង នៅក្នុងតំបន់ទំនប់កប់ស្រូវនេះ ដែលផ្តល់លទ្ធភាពដល់ប្រជាពលរដ្ឋខ្មែរមានចំណូលមធ្យម អាចមានលទ្ធភាពទិញបាន ជាពិសេសគូស្រករដែលបម្រុងនឹងរៀបការ ឬទើបនឹងរៀបការថ្មីៗនេះ។

គម្រោងផ្ទះតម្លៃមធ្យម ត្រូវបានបង្កើតឡើងក្នុងគោលបំណងបម្រើដល់ ផលប្រយោជន៍ប្រជាពលរដ្ឋកម្ពុជា មិនមែនគិតលើប្រាក់ចំនេញនោះទេ ហើយក៏មានទស្សនវិស័យរួមគ្នាជាមួយរាជរដ្ឋាភិបាល ក្នុងការពង្រីកទីក្រុង ទៅជាទីក្រុងលំនៅដ្ឋានពិតប្រាកដ ពោលគឺផ្លាស់ប្តូរវាលស្រែ ទៅជាលំនៅដ្ឋាន។

បន្ទាប់ពីការវិនិយោគលើ ១ពាន់ផ្ទះដំបូង ក្រុមហ៊ុននៅតែស្វាគមន៍ជានិច្ចចំពោះអតិថិជន ដែលពេញចិត្តនឹងគម្រោងប្លង់ និងតម្លៃផ្ទះនេះ ហើយក្រុមហ៊ុន អាចនឹងសាងសង់ជូននៅទីតាំងអាទិភាពទី២ ដែលស្ថិតនៅក្នុងតំបន់នេះ។

សម្រាប់លំនៅដ្ឋានរចនាបថអូស្រ្តាលីដំបូងមាន ១ជាន់ នឹង ២ជាន់ ដែលមានទំហំ ៥x១២ម៉ែត្រ សល់ដីខាងមុខផ្ទះ ៦ម៉ែត្រ និងខាងក្រោយផ្ទះ ២ម៉ែត្រ រៀបឥដ្ឋការ៉ូឡាជាមួយសួនបៃតង នឹងមានរបងបិទបើក។

គួរបញ្ជាក់ថា លក្ខខណ្ឌនៃការទិញផ្ទះ អតិថិជនអាចបង់ពេញថ្លៃ បង់ជាមួយធនាគារជាមួយអត្រាការប្រាក់ទាប ឬអាចបង់រំលោះជាមួយក្រុមហ៊ុន ទៅតាមលក្ខខណ្ឌដែលនឹងបង្ហាញជូនលម្អិត នៅក្នុងពិធីសម្ពោធដាក់លក់ នៅក្រោយបុណ្យអុំទូក៕

img_4215 img_4216

ផ្ទះគំរូរចនាបថអូស្រ្តាលី

img_4183 img_4189

ការចុះពិនិត្យផ្ទាល់របស់ក្រុមការងារ

img_4161 img_4157 img_4155 img_4150

ការដ្ឋានសាងសង់ទំនប់បឹងកប់ស្រូវ

img_4152

ផ្លូវក្រវ៉ាត់ក្រុង ៦០ម៉ែត្រ

img_4214

លំនៅដ្ឋានប្រជាជននៅក្នុងតំបន់ទំនប់កប់ស្រូវ

img_4211 img_4203

ទេសភាពតំបន់ទំនប់កប់ស្រូវ

ចែកចាយបន្ត