Post News Media ព័ត៌មានសុខភាព ៧ចំណុចដែលស្រី...

៧ចំណុចដែលស្រីៗគួរដឹង មុនពេលគក់អាវទ្រនាប់

ចែកចាយបន្ត

តាមពិតទៅអ្នកអាចពាក់អាវទ្រនាប់បានច្រើនដងមុននឹងគក់ទឹក លុះត្រាតែអ្នកបានបញ្ចេញសកម្មភាពខ្លាំងចេញញើសច្រើន។ តាមការស្រាវជ្រាវបានរកឃើញថា ការគក់អាវទ្រនាប់ញឹកញាប់ពេក អាចធ្វើឲ្យឆាប់ខូច និងធ្វើឲ្យបាត់បង់ភាពយឺតរបស់សាច់ក្រណាត់។ មិនតែប៉ុណ្ណោះ វាក៏អាចធ្វើឲ្យខ្សែចងអាវលែងមានភាពយឺត នាំឲ្យប៉ះពាល់អាក្រក់ដល់ដើមទ្រូង។

ដូច្នេះហើយដើម្បីរក្សាអាវទ្រនាប់ឲ្យបានយូរ ក៏ដូចជាមិនងាយខូចទ្រង់ទ្រាយ អ្នកគួរតែអនុវត្តតាមវិធីខាងក្រោមនេះ៖

១. បន្ថយការបោកគក់
អ្នកអាចពាក់អាវទ្រនាប់ ២ទៅ ៣ដងមុននឹងអ្នកសម្រេចចិត្តបោកគក់វា ព្រោះការពន្យាពេលបោកគក់ អាចជួយរក្សាទ្រង់ទ្រាយអាវបានយូរ។ ប៉ុន្តែ ប្រសិនបើអ្នកត្រូវបញ្ចេញញើសច្រើន នោះអ្នកត្រូវតែបោកគក់វាចេញភ្លាម។

២. ប្រើដៃបោកគក់
មុននឹងគក់ អ្នកត្រូវលាយសាប៊ូម្សៅទៅក្នុងទឹក រួចត្រាំអាវទ្រនាប់ឲ្យបាន ១៥នាទីសិន។ ធ្វើបែបនេះ ទើបងាយស្រួលក្នុងជម្រះ ក្អែល ក្លិន ព្រមទាំងមេរោគដែលនៅតោងជាប់នឹងអាវ។ តែបើអ្នកប្រើម៉ាស៊ីនបោកគក់វិញ ច្បាស់ជាខូចទ្រង់ទ្រាយអាវជាពុំខាន។

៣. បោកគក់អាវទ្រនាប់ដាច់ដោយឡែកពីគេ
ខោអាវមួយចំនួនអាចចេញពណ៌ ធ្វើឲ្យប្រលាក់ខោអាវផ្សេងៗទៀតដែលត្រាំជាមួយ ជាពិសេសអាវស។ ម្យ៉ាងវិញទៀត អាវទ្រនាប់ត្រូវពាក់ជាប់ផ្ទាល់នៅនឹងស្បែក ដែលធ្វើឲ្យក្អែក និងបាក់តេរីជាច្រើនតោងជាប់អាវខណដែលចេញញើស។ ហេតុដូច្នេះ ដើម្បីងាយស្រួលក្នុងការបោកគក់ អ្នកគួរតែដាក់ដោយឡែកពីគេ។

៤. កុំប្រើកម្លាំងខ្លាំងៗពេក

ការបោកគក់អាវទ្រនាប់ដោយប្រើដៃ អ្នកមិនត្រូវច្របាច់ខ្លាំងៗពេកនោះទេ ព្រោះវាអាចខូចទ្រង់ទ្រាយអាវ។ ជាពិសេសកុំប្រើកម្លាំងពូតខ្លាំងពេក គ្រាន់តែច្របាច់ថ្នមៗរួចដាក់ហាលតែម្តង។

៥. ហាមព្យួរ
ជៀសវាងការដាក់ព្យួរអាវទ្រនាប់នៅពេលហាល ព្រោះវាអាចធ្វើឲ្យអាវទ្រនាប់ខូចទ្រង់ទ្រាយសាច់ក្រណាត់ ហើយពាក់លែងត្រូវ។ ម្យ៉ាងវិញទៀតអ្នកក៏ត្រូវជៀសវាងការដាក់ហាលចំថ្ងៃខ្លាំងផងដែរ ព្រោះវានឹងធ្វើឲ្យខូចប្រដាប់ខ្ទាស់អាវទ្រនាប់។

៦. ហាមអ៊ុត
អាវទ្រនាប់មិនត្រូវការភ្លីនោះទេ ដូច្នេះអ្នកត្រូវជៀសវាងអ៊ុត ព្រោះកម្តៅអាចនាំឲ្យខូចអាវ។ ណាមួយអាវទ្រនាប់មិនចេះជ្រួញ ហើយមិនត្រូវកែតម្រូវអ្វីទាំងអស់។

៧. រក្សាអាវទ្រនាប់ឲ្យត្រឹមត្រូវ
កុំបោះអាវទ្រនាប់ខាងក្រោមខោអាវផ្សេងៗ ឬដាក់កប់ជ្រៅក្នុងកន្ទ្រក់ខោអាវ។ ត្រូវរក្សាអាវទ្រនាប់ទុកកន្លែងដែលត្រឹមត្រូវដូចជា នៅក្នុងថតតុ កន្លែងដែលមានខ្យល់ចេញចូលល្អ ហើយអាចរក្សាទ្រង់ទ្រាយរបស់វាបានល្អ៕