Post News Media ព័ត៌មានសុខភាព ទម្លាប់អាក្រក...

ទម្លាប់អាក្រក់៤ចំណុច បើជៀសមិនបានទេទ្វារមាសនឹងមានបញ្ហា

ចែកចាយបន្ត

ទ្វារមាសគឺជាតំបន់រសើប ហើយក៏ជាចំណុចមួយ​ដ៏សំខាន់បំផុតនៅលើរាងកាយ​របស់មនុស្សស្រីគ្រប់រូបផងដែរ។ ហេតុដូច្នេះ ការថែរក្សាទ្វារមាស​ជាអាទិភាពចម្បង​ដែលស្ត្រីត្រូវយកចិត្តទុកដាក់​ឲ្យមែនទែន។

ទោះជាយ៉ាងណា បើយោងតាមគេហទំព័រ boldsky បានបង្ហាញថា ទម្លាប់រស់នៅប្រចាំថ្ងៃ និងវិធីថែក្សារ​មួយចំនួន​អាចមាន​ផលអាក្រក់​ដល់ទ្វារមាស ប៉ុន្តែមនុស្សស្រី​ភាគច្រើនធ្វើដោយមិនដឹងខ្លួន​នោះទេ។ តើទម្លាប់អ្វីខ្លះទៅដែលប៉ះពាល់ដល់ទ្វារមាស?

១.ស្លៀកខោក្នុងបិទជិតគ្មានខ្យល់ចេញចូល
ការស្លៀខោក្នុងបិទជិតខ្លាំងពេកគ្មានខ្យល់ចេញចូលគ្រប់គ្រាន់ ធ្វើឲ្យទ្វារមាសបែកញើស ដែលជាឱកាសល្អសម្រាប់ពពួកបាក់តេរី និងរោគផ្សិតរីកលូតលាស់។ ហេតុនេះហើយ ទើបក្រុមអ្នកជំនាញបានផ្តល់អនុសាសន៍ ឲ្យស្លៀកខោក្នុងដែលផលិតពីកប្បាស ព្រោះវាអាចស្រូបយកជាតិសំណើមបានល្អ។

២.ការកោររោម
ការកោររោមបានក្លាយទៅជាទម្លាប់ធម្មតាទៅហើយ សម្រាប់មនុស្សស្រីនៅប៉ែកអឺរ៉ុប។ ប៉ុន្តែ តើអ្នកដឹងទេ? រោម​នៅតំបន់​នេះដើរតួនាទី​ជាស្រទាប់ការពារ​ដ៏សំខាន់ ក្នុងការកាត់បន្ថយភាពកកិតនៃស្បែក និងកាត់បន្ថយហានិភ័យនៃការឆ្លងមេរោគ។ ហេតុនេះ ប្រសិនបើអ្នក​កោររោមនៅតំបន់នេះ អាចបណ្តោលឲ្យ​រលាត់ស្បែក ហើយងាយនឹងឆ្លងមេរោគផ្សេងៗ។

៣.ការធ្វើអនាម័យទ្វារមាស
ជាធម្មតាអ្នកមិនគួរលាងសម្អាតតំបន់ឯកជននោះទេ ព្រោះទឹកអនាម័យ​ខ្លះ​អាចបង្កឲ្យ​បាត់បង់​តុល្យភាព​នៃបាក់តេរីល្អ​នៅក្នុង​ទ្វារមាស ហើយងាយនឹងឆ្លងមេរោគផ្សិត​ថែមទៀត។ ដូច្នេះ អ្នកត្រូវចាំថា ទ្វារមាស​មានសមត្ថភាព​ពីធម្មជាតិ​ក្នុងការលាងសម្អាត និងកម្ចាត់​ពពួកបាក់តេរី​ដោយខ្លួនឯងហើយ។

៤.ញ៉ាំអាហារផ្អែម និងហិរច្រើនពេក
ការទទួលទានជាតិស្ករ និងអាហារហិរ ហួសហេតុពេក អាចបង្កើនហានិភ័យឆ្លងមេរោគផ្សិត ព្រមទាំងធ្វើឲ្យ​ទ្វារមាស​ធំក្លិន​មិន​ល្អ។ ដូច្នេះ អ្នកគួរតែជៀសវាង​ទម្លាប់មួយនេះ ដើម្បីការពារកុំឲ្យ​មានផលប៉ះពាល់ដល់តំបន់​ទ្វារមាស៕