Post News Media ព័ត៌មានសុខភាព ដំណឹងអាក្រក់!...

ដំណឹងអាក្រក់! ដំឡូងបារាំងបំពង ជាឃាតករធ្វើឲ្យអ្នកអាយុខ្លី

ចែកចាយបន្ត

មនុស្សជាច្រើនចូលចិត្តទទួលទានដំឡូងបារាំងបំពងខ្លាំងណាស់ ព្រោះវាមានរសជាតិឆ្ងាញ់ ហើយងាយស្រួលក្នុងការចម្អិនបំផុត។ ប៉ុន្តែអ្នកទាំងនោះមិនទាន់ដឹងថា ការទទួលទានដំឡូងបារាំងបំពងញឹកញាប់ពេក អាចបង្កឲ្យមានផលវិបាកដល់សុខភាពនោះឡើយ។ ជាពិសេស ប្រសិនបើអ្នកទទួលទានច្រើនជាង ២ដងក្នុងមួយសប្តាហ៍ អាចអាយុខ្លីដោយសារតែកើតជំងឺកាចៗច្រើនមុខ។

ជំងឺមហារីក
បន្ទាប់ពីក្រុមអ្នកជំនាញបានធ្វើការស្រាវជ្រាវអស់រយ:ពេល ៨ឆ្នាំ បានរកឃើញ សារធាតុម្យ៉ាងដែលមានឈ្មោះថា acrylamide ត្រូវបានបង្កើតឡើងក្នុងកំឡុងពេលដំឡូងត្រូវបានគេបំពង។

សារធាតុ acrylamide អាចកើតមានចំពោះអាហារដែលសម្បូរទៅដោយជាតិម្សៅដូចជា ដំឡូងបារាំង ដែលបំពងនៅក្នុងប្រេងមានសីតុណ្ហភាពខ្ពស់។

លើពីនេះទៅទៀត Acrylamide ត្រូវបានអ្នកជំនាញអាមេរិក ចាត់ទុកជាសារធាតុបង្កមហារីក ឬជាភ្នាក់ងារបង្កជំងឺមហារីក។ ព្រោះ វាអាចបង្កទៅជាដុំសាច់មហារីកនៅក្នុងសួត ក្រពះ ក្រពេញទីរ៉ូអ៊ីត។ល។

បង្កជាជំងឺផ្សេងៗ
ជាទូទៅដំឡូងបារាំងត្រូវបានគេចម្អិនដោយប្រើប្រេង ឬខ្លាញ់ ដូច្នេះសារធាតុទាំងនេះនឹងបៀមជាប់នៅក្នុងដំឡូង ដែលធ្វើឲ្យអ្នកទទួលទានត្រូវប្រឈមនឹងជំងឺដ៏មានគ្រោះថ្នាក់ដួចជា ធាត់ ឡើងកូឡេស្តេរ៉ុល សម្ពាធឈាមឡើងខ្ពស់ និងកើតជំងឺបេះដូង។

អាស្រ័យហេតុនេះ អ្នកគួរតែជៀសវាងញ៉ាំដំឡូងបារាំងបំពង ហើយជំនួសដោយដំឡូងបារាំងស្ងោរ ឬចំហ៊ុយវិញប្រសើរជាង៕