Post News Media ព័ត៌មានសុខភាព អាថ៌កំបាំង៦ចំ...

អាថ៌កំបាំង៦ចំណុចនៃការថើប ដែលគ្រប់គ្នាមិនធ្លាប់ដឹងពីមុន

ចែកចាយបន្ត

ការថើប គឺជាវិធីដ៏ល្អបំផុត ដើម្បីបង្ហាញពីសេចក្តីស្រឡាញ់ចំពោះគូស្នេហ៍ ឬជាការបង្ហាញពីក្តីស្រឡាញ់របស់ឪពុកម្តាយចំពោះកូន។ ក៏ប៉ុន្តែបើយោងតាមគេហទំព័រ soha បានបង្ហាញថា ការថើបអាចមានផលវិជ្ជមាន និងអវិជ្ជមានចំពោះសុខភាព ប្រសិនបើដៃគូមានផ្ទុកជំងឺឆ្លងផ្សេងៗ។ ខាងក្រោមនេះ គឺជាផលល្អ និងផលអាក្រក់ ដែលបានមកពីការថើប៖

ការថើបជាឱថស
ការថើបអាចជួយជំរុញដល់ការផលិតអ័រម៉ូន Endorphin ដើម្បីកាត់បន្ថយការឈឺចាប់ប្រសើរជាងការប្រើប្រាស់ថ្នាំបំបាត់ការឈឺចាប់មួយចំនួនទៅទៀត។ នេះជាមូលហេតុដែលធ្វើឲ្យអ្នកមានអារម្មណ៍សប្បាយរីករាយ បន្ទាប់ពីការថើប។ ប្រសិនបើអ្នកមានអារម្មណ៍មិនល្អ ប៉ុន្តែប្រសិបើទទួលបានស្នាមថើបរបស់ដៃគូ ច្បាស់ជាមានអារម្មណ៍រីករាយឡើងវិញ។

ការថើបជួយឲ្យមានសុខភាពល្អ
ការសិក្សាមួយចំនួនបានបង្ហាញថា ការថើប អាចធ្វើឲ្យអ្នកមានសុខភាពល្អ ព្រោះវាអាចជួយជំរុញឲ្យលំហូរឈាមរត់បានស្រួល បំបាត់ការឈឺក្បាល ជួយបង្កើនសុខភាពស្បែក ជួយកាត់បន្ថយបញ្ហាខ្សោយទ្រុឌទ្រោមនៃរាងកាយ។ ចំពោះគូស្វាមី ដែលបានថើបគ្នាច្រើនដងក្នុងមួយថ្ងៃ អាចកើតមានបញ្ហាសុខភាពតិច ព្រមទាំងប្រឈមនឹងជំងឺបេះដូង ទាបជាងគូស្នេហ៍មិនដែលថើបគ្នា។

ការថើបអាចដុតបំផ្លាញ់កាឡូរី
ការថើបមិនមែនជាវិធីសាស្ត្រដែលមានប្រសិទ្ធភាពជាងការធ្វើលំហាត់ប្រាណនោះទេ ហើយវាក៏មិនមែនជាវិធីសម្រកទម្ងន់ដែរ។ ក៏ប៉ុន្តែការថើបអាចជួយដុតបំផ្លាញ់កាឡូរីរហូតដល់ទៅ ១៥០កាឡូរីក្នុងមួយម៉ោង។

ការថើបអាចកាត់បន្ថយភាពចាស់ជរា
ការថើបអាចជួយឲ្យសាច់ដុំមុខមានចលនាច្រើន ដែលអាចជួយការពារពីភាពចាស់ជរាបាន។ ការថើបញឹកញាប់អាចជួយរក្សាសាច់ដុំផ្ទៃមុខឲ្យមានភាពរឹងមាំ និងកាត់បន្ថយភាពយារធ្លាក់។

ការថើបអាចឆ្លងជំងឺ
ការថើបអាចធ្វើឲ្យអ្នកឆ្លងជំងឺមួយចំនួនដូចជា ជំងឺរើម ឬស្ស រលាកថ្លើមប្រភេទB ផ្តាសាយ និងជំងឺឆ្លងផ្សេងៗទៀត។ ដូច្នេះ អ្នកត្រូវមានការប្រុងប្រយ័ត្ន ប្រសិនបើករណីមិនចាំបាច់កុំថើបឲ្យសោះ ជាពិសេសជាមួយនឹងមនុស្សដែលមិនមែនជាដៃគូររបស់អ្នក។

ការថើបអាចឆ្លងបាក់តេរី ២៧៨ប្រភេទផ្សេងគ្នា
ផលប៉ះពាល់អវិជ្ជមានមួយទៀតនៃការថើប គឺការឆ្លងមេរោគផ្សេងៗ ក៏ប៉ុន្តែមិនមែនមានន័យថា អ្នកត្រូវឈបើថើបមនុស្សជាទីស្រឡាញ់នោះទេ។ ដើម្បីដោះស្រាយបញ្ហានេះ អ្នកត្រូវព្យាយាមធ្វើអនាម័យមាត់ធ្មេញមួយថ្ងៃឲ្យបានពីរដង ដើម្បីលុបបំបាត់បាក់តេរី ព្រមទាំងកាត់បន្ថយហានិភ័យនៃជំងឺឈឺធ្មេញផងដែរ៕