Post News Media ព័ត៌មានអន្តរជាតិ ប្រវត្តិប្រធា...

ប្រវត្តិប្រធានាធិបតី​ដែលចង់គ្រប់គ្រងអំណាចបាន១០០០ឆ្នាំ របស់​ប្រទេស​ហ្គំប៊ី

ចែកចាយបន្ត

ហ្គំប៊ី: ប្រធានាធិបតី​ដែលចង់គ្រប់គ្រងអំណាចបាន១០០០ឆ្នាំរបស់​ប្រទេស​ហ្គំប៊ី លោក Yahya Jammeh កើតនៅថ្ងៃទី២៥ ខែឧសភា ឆ្នាំ១៩៦៥ ក្នុងខេត្ត កានីលា ដែលជាខេត្តដាច់ស្រយាលបំផុត នៅជាប់ព្រំដែនប្រទេសសេណាហ្គាល់។

កាលពីវ័យកុមារ​ លោក ជាក្មេងចូលចិត្តលេងសើចច្រើន ហើយមិនសូវចូលចិត្តពួកអភិជនទេ។ ដល់ពេលធំដឹងក្តី លោកបានបន្តការសិក្សានៅវិទ្យាស្ថាន Western Hemisphere ។ យោងតាមមិត្តភ័ក្ររបស់លោក Yahya Jammeh បាននិយាយថា លោក ជាសិស្សដែលមិនសូវរៀនពូកែទេក្នុងថ្នាក់ ហើយចូលចិត្តមើលងាយអ្នកដ៏ទៃ។

ក្រោយបញ្ចប់ការសិក្សា លោកបានចូលរួមបម្រើការងារជាកងទ័ពជាតិហ្គាំប៊ី នៅក្នុងឆ្នាំ ១៩៨៤ ដោយសារលោកជាយោធាដែលរៀនបានខ្ពស់ជាងគេ លោកត្រូវបានតែងតាំងជាអនុសេនីទោនៅឆ្នាំ១៩៨៩។ នៅខែសីហាឆ្នាំ ១៩៩២ លោកបានក្លាយជាមន្ត្រីមេបញ្ជាការកងរាជអាវុធហត្ថ នៅបន្ទាយ Yundum Barracks។ ហើយក្រោយមកលោកបានទទួលការបណ្តុះបណ្តាផ្នែកយោធា នៅក្នុងប្រទេសសេណេហ្គាល់ រួចបន្តទៅសិក្សាបន្ទាយយោធា Fort McClellan រដ្ឋ Alabama សហរដ្ឋអាមេរិក ។

លោក Yahya Jammeh បានចូលរួមជាមួយនឹងក្រុមកងទ័ពវ័យក្មេង ដើម្បីធ្វើរដ្ឋប្រហារយោធាទម្លាក់ ប្រធានាធិបតីលោក Sir Dawda Jawara ដែលជាមនុស្សល្មោភអំណាច ក្នុងរដ្ឋធានីបង់ហ្សូល នៅថ្ងៃទី ២២ ខែកក្កដាឆ្នាំ១៩៩៤​ រួចឡើងកាន់អំណាចជាប្រធានាធិបតីបណ្តោះអាសន្នក្នុងវ័យ ២៩ ឆ្នាំ។

លោក ត្រូវបានប្រជាជនបោះឆ្នោតឲ្យជាប្រធានាធិបតីពេញច្បាប់ នៅ​ឆ្នាំ១៩៩៦ រួចជាប់ជាប្រធានាធិបតីសារជាថ្មីនៅ ២០០១, ២០០៦ និង២០១១ ប៉ុន្តែលោក បានចាញ់ឆ្នោតនៅចុងឆ្នាំ២០១៦។ បើតាមអ្នកវិភាគនយោបាយ ក្នុងតំបន់បានឲ្យដឹង ការឈ្នះឆ្នោតផ្ទួនៗនេះ​ ដោយសារតែលោក មាន​ការគាំទ្រច្រើនពីយោធា ហើយ យោធាទាំងនោះ បានបង្ខំឲ្យប្រជាជន ក្នុងតំបន់ខ្លួនបោះឲ្យលោក Yahya Jammeh ។​ នៅឆ្នាំ២០០៧ លោក បាននិយាយថា លោកបានរកឃើញឱសថបុរាណ អាចព្យាបាលជំងឺអេដស៍បាន ដែលលោក បានដាក់វាក្នុងការឃោសនាបោះឆ្នោត ក្នុងឆ្នាំ២០០៦។

ក្រោយការការចាញ់ឆ្នោត នៅខែធ្នូ ឆ្នាំ២០១៦ លោក Yahya Jammehមិនព្រមទទួលស្គាល់លទ្ធផលនោះទេ ដោយចោទថា មានភាពមិនប្រក្រតីក្នុងការបោះឆ្នោត រួចបានដេញប្រធានាធិបតីថ្មី លោក Adama Barrow ចេញពីប្រទេស។ លុះក្រោយមកទៀត ដោយមានការសម្ពាធពីបរទេស បានធ្វើឲ្យលោកយល់ព្រមចុះចេញពីតំណែង។

ការ​សម្រេច​ចិត្ត​នេះ ​ត្រូវ​បាន​ធ្វើ​ឡើង​បន្ទាប់​ពី​ប្រធានាធិបតី​ហ្គីណេ លោក ​Alpha Conde ​និង​ប្រធានាធិបតី​ម៉ូរីតានី​ លោក ​Mohamed Ould Abdel Aziz បាន​ទៅ​ដល់​រដ្ឋធានី​បង់ហ្សុល​ ដើម្បី​បញ្ចុះបញ្ចូល​លោក​ Jammehឲ្យ​ផ្ទេរ​អំណាច​ដោយសន្តិវិធីបើមិនដូច្នោះទេលោកនិងត្រូវ​ចាកចេញ​ពី​ប្រទេស បើ​មិន​ដូច្នោះ​ទេ​លោក​នឹង​ត្រូវ​ប្រឈម​នឹង​ចំណាត់ការ​ផ្លូវ​យោធាអាហ្វ្រិក​ខាង​លិច​ដែល​មាន​សមាជិក​១៥​ប្រទេស ដែល​ហៅ​កាត់​ថា ECOWAS វាយកម្តិចតែម្តងនៅដើមឆ្នាំ ២០១៧។

លោក Yahya Jammeh បានចេញដំណើរទៅកាន់ប្រទេសហ្គីណេ ដោយយន្តហោះផ្ទាល់ខ្លួន រួមជាមួយយន្តហោះដឹកទំនិញមួយផ្សេងទៀត ដែលមានផ្ទុកទៅដោយរថយន្តទំនើប និងវត្ថុមានតំលៃផ្សេងទៀត។ក្រោយការចេញពីប្រទេសរបស់លោកថវិកាជាតិជាង ១១លានដុល្លារ ត្រូវបានបាត់បង់។

ក្រោយលោក Yahya Jammeh បានគ្រប់គ្រងប្រទេសមួយនេះអស់រយ:ពេល២២​ ឆ្នាំ ចាប់តាំងឆ្នាំ ១៩៩៤មក ការរំលោភសិទ្ធមនុស្ស ការចាប់អ្នកនិយោបាយដាក់ពន្ធនាគារ និងមនុស្សជាច្រើននាក់ ត្រូវបានបាត់ខ្លួន ក្រោយការបង្ក្រាបបាតុកម្មរបស់ក្រុមយោធា មានរាប់មិនអស់នៅទូទាំងប្រទេស៕

ចែកចាយបន្ត