កូរ៉េៈ មនុស្សស្លាប់កើនទ្បើងដល់ ៥នាក់ ខណៈម្នាក់ទៀតកំពុងបាត់ខ្លួន បន្ទាប់ពីព្យុះទីហ្វុង ឈ្មោះថា Chaba បានវាយប្រហារលើកោះជេជូ កាលពីល្ងាចថ្ងៃអង្គារ និងតំបន់ផ្សេងទៀតនៅភាគខាងត្បូងប្រទេស កាលពីថ្ងៃពុធម្សិលមិញ។

ក្នុងចំណោមអ្នកស្លាប់មានម្នាក់ជាបុរសវ័យ ៦០ឆ្នាំ ត្រូវទឹកជំនន់ហូរកួចយកទៅនៅមុខផ្ទះល្វែងមួយ ក្នុងទីក្រុង អ៊ូលសាន។ ប៉ុន្មាននាទីក្រោយមក សាកសពរបស់គាត់ត្រូវបានគេរកឃើញទើរលើបង្កាន់ដៃផ្លូវ ចម្ងាយប្រមាណ៦០ ម៉ែត្រពីកន្លែងកើតហេតុ។ អ្នកពន្លត់អគ្គិភ័យម្នាក់ បានព្យាយាមសង្គ្រោះមនុស្ស នៅតំបន់ដាច់ស្រយាល ក៏ត្រូវលង់ទឹក ស្លាប់ដែរ។

មនុស្ស ២នាក់ បានស្លាប់នៅទីក្រុងភូសាន កាលពីព្រឹកថ្ងៃពុធ និងស្ត្រីម្នាក់ទៀតត្រូវកម្លាំងខ្យល់បក់ទម្លាក់ពី លើផ្ទះជាន់ទីពីរនៅស្រុកស៊ូយ៉ង់។ បុរសម្នាក់ផ្សេងទៀតបាត់ខ្លួន ក្រោយព្យាយាមជិះទូកនៅកំពង់ផែ កោះជេជូ។

ផ្ទះសម្បែងពលរដ្ឋលើកោះប្រមាណ ៤៩០០០ខ្នង ត្រូវដាច់អគ្គិសនីប្រើប្រាស់ ក្រោយដើមឈើធំមួយ បានបាក់ សង្កត់បង្គោលភ្លើង។ ជើងហោះហើរ និងកប៉ាល់ជិះកម្សាន្តជាច្រើនត្រូវបានលុបចោល អ្នកដំណើរប្រមាណ ៦៥០០នាក់ត្រូវពន្យារពេលធ្វើដំណើរចេញពីព្រលានជេជូ។

ព្យុះទីហ្វុងនេះ ត្រូវគេចាត់ទុកថាជាព្យុះកម្លាំងខ្លាំងបំផុត ចាប់តាំងពីឆ្នាំ២០០៣មក ដោយមានល្បឿន ៥៦,២ម៉ែត្រក្នុងមួយវិនាទី ហើយមានកម្ពស់ទឹកភ្លៀង ៧០មិល្លីម៉ែត្រក្នុងមួយម៉ោងនៅតំបន់ភ្នំ Halla។

ព្យុះកំណាចខាងលើ បានធ្វើដំណើរដល់ទីក្រុងអ៊ូលសាន ដែលស្ថិតនៅភាគខាងជើងទីក្រុងភូសាន ៥៧គីឡូម៉ែត្រ កាលពីល្ងាចថ្ងៃពុធម្សិលមិញ បណ្ដាលឲ្យរថភ្លើងល្បឿនលឿន KTX ត្រូវផ្អាកជាច្រើន រួមទាំងហេដ្ឋារចនាសម្ពន្ធ ចរាចរណ៍ជាច្រើនត្រូវបានបំផ្លាញផងដែរ៕