Post News Media ព័ត៌មានជាតិ ប៉ូលិស និងទាហ...

ប៉ូលិស និងទាហានកម្ពុជា ២នាក់ ត្រូវវៀតណាម ចាប់ខ្លួនរឿងគ្រឿងញៀន

ចែកចាយបន្ត

រតនគិរី: មន្ត្រីនគរបាល និងមន្ត្រីយោធារបស់កម្ពុជា ត្រូវបានប៉ូលិសវៀតណាម ចាប់ខ្លួនពាក់ព័ន្ធករណីជួញដូរគ្រឿងញៀន កាលពីវេលាម៉ោង៨៖២០នាទីព្រឹក ថ្ងៃទី១៥ ខែតុលា ឆ្នាំ២០១៦ ប៉ុន្តែរហូតមកទល់នឹងថ្ងៃទី១៧ ខែតុលានេះ មេបញ្ជាការនគរបាលវរសេនាតូចលេខ៦២៣ របស់កម្ពុជា ឆ្លើយថា មិនដឹង។

របាយការណ៍របស់នគរបាលវៀតណាម ប៉ុស្តិ៍លេខ៦០១ ប្រចាំតំបន់ភ្នំក្រហម ជាប់ព្រំប្រទល់ប្រទេសកម្ពុជា បានបង្ហាញថា នៅថ្ងៃទី១៥ ខែតុលា ឆ្នាំ២០១៦ កម្លាំងប៉ុស្តិ៍៧០២ វៀតណាម និងកម្លាំងអង្គភាពប្រឆាំងគ្រឿងញៀនវៀតណាម បានឃាត់ខ្លួនជនជាតិខ្មែរ ២នាក់ ពីបទជួញដូរគ្រឿងញៀនឆ្លងដែនខុសច្បាប់ នៅចំណុចខាងលិចឃ្លាំងធំវៀតណាម។ ជនសង្ស័យមានឈ្មោះ ចាប សាមាន ភេទប្រុស អាយុ២៨ឆ្នាំ ជាមន្ត្រីប៉ុស្តិ៍លេខ៦០១ (ភ្នំក្រហម) នៃវរសេនាតូចនគរបាលការពារព្រំដែនគោកលេខ៦២៣ និងម្នាក់ទៀត ឈ្មោះ អាន ប៊ុនធី ភេទប្រុស អាយុ៣៩ឆ្នាំ ជាមន្ត្រីយោធា ប្រចាំការនៅប៉ុស្តិ៍ខ្លាធំ នៃវរសេនាតូចការពារព្រំដែនគោកលេខ១០២។

មេបញ្ជាការវរសេនាតូចលេខ៦២៣ លោក ងួន សុវណ្ណា នៅរសៀលថ្ងៃទី១៧ ខែតុលានេះ ឲ្យដឹងថា រហូតដល់ពេលនេះ លោកមិនបានដឹងថា មន្ត្រីខ្មែរ ដែលនគរបាលវៀតណាម ឃាត់ខ្លួនពាក់ព័ន្ធករណីនាំគ្រឿងញៀនឆ្លងដែននោះ មានវាសនាយ៉ាងណាទេ ព្រោះសូម្បីតែលោកចង់សួរសុខទុក ក៏គេមិនឲ្យជួបផង។ ម្យ៉ាងករណីនេះ ជារឿងរបស់ម្ចាស់ខ្លួនគេប្រព្រឹត្តល្មើស មិនអាចមានដំណោះស្រាយណាមួយបានទេ ហើយក៏មិនមានអ្វីពាក់ព័ន្ធនឹងអង្គភាពដែរ ហើយលោកក៏មិនដឹងថា ថ្នាំញៀនមានចំនួនប៉ុន្មាននោះទេ។

តាមរបាយការណ៍ មិនមានបញ្ជាក់ពីចំនួនបរិមាណ នៃគ្រឿងញៀននោះទេ ក៏ប៉ុន្តែបើតាមប្រភពព័ត៌មានថា គ្រឿងញៀននោះ មានចំនួន១គីឡូក្រាម ជាប្រភេទម្សៅក្រាម ពណ៌សថ្លា។

បច្ចុប្បន្ន មន្ត្រីយោធា និងនគរបាលខ្មែរទាំង២នាក់ ត្រូវបានសមត្ថកិច្ចវៀតណាម កសាងសំណុំរឿងចាត់ការទៅតាមផ្លូវច្បាប់របស់ប្រទេសវៀតណាម៕

យោធាខ្មែរ