Post News Media ព័ត៌មានអន្តរជាតិ កូរ៉េខាងជើង ប...

កូរ៉េខាងជើង ប្រកាសមិនខ្លាច ចំពោះការដាក់ទណ្ឌកម្មរបស់អាមេរិកទ្បើយ

ចែកចាយបន្ត

ស្វីស: អគ្គរដ្ឋទូតរងក្រុងព្យុងយ៉ាង លោក Choe Myong Nam បានប្រាប់ភ្នាក់ងារ Reuters នៅថ្ងៃអង្គារថា រដ្ឋាភិបាលកូរ៉េខាងជើង មិនមានអ្វីត្រូវខ្លាចឡើយ សម្រាប់ការផ្លាស់ប្តូរណាមួយរបស់អាមេរិក ដើម្បីបង្កើនការដាក់ទណ្ឌកម្មប្រទេសខ្លួន ក្នុង គោលបំណងកាត់ផ្ដាច់ប្រព័ន្ធហិរញ្ញវត្ថុសកលយ៉ាងណា ក៏ក្រុងព្យុងយ៉ាង នឹងនៅតែបន្តការបង្កើនល្បឿនកម្មវិធីនុយក្លេអ៊ែរ និងមីស៊ីលរបស់ខ្លួនដដែល។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី២២ ខែមីនា ឆ្នាំ២០១៧។

ថ្លែងក្នុងបេសកកម្មរបស់អង្គការសហប្រជាជាតិ នៅទីក្រុងហ្សឺណែវ ប្រទេសស្វីស លោក Choe Myong Nam បាននិយាយថា កូរ៉េខាងជើង នឹងអភិវឌ្ឍសមត្ថភាពវាយប្រហារលើកដំបូង រួមទាំងមីស៊ីលឆ្លងទ្វីប (ICBM) របស់ខ្លួនផងដែរ ។

ដកស្រង់សម្ដីមន្ត្រីជាន់ខ្ពស់អាមេរិក នៅទីក្រុងវ៉ាស៊ីនតោន បានរាយការណ៍កាលពីថ្ងៃច័ន្ទថា រដ្ឋបាលលោក ត្រាំ កំពុងពិចារណាលើការដាក់ទណ្ឌកម្ម ជាវិធានការដើម្បីទប់ស្កាត់នឹងការគំរាមកំហែងនុយក្លេអ៊ែរ និងមីស៊ីលពីសំណាក់កូរ៉េខាងជើង។

លោក Choe បានប្រាប់ Reuters ថា « ខ្ញុំគិតថា ការធ្វើបែបនេះ គឺជាការឆ្លើយតបនឹងដំណើរទស្សនកិច្ចរបស់លេខាធិការនរដ្ឋ លោក Rex Tillerson ទៅកាន់ប្រទេសជប៉ុន កូរ៉េខាងត្បូង និងចិន ដែលយើងចង់បង្ហាញថា ពិតជាមិនមានការភ័យខ្លាច ចំពោះទង្វើបែបនោះទេ »។

លោក Choe បានបន្តទៀតថា «បើទោះបីជាមានការហាមឃាត់ ប្រព័ន្ធប្រតិបត្ដិការអន្ដរជាតិ, និងហិរញ្ញវត្ថុសកលរបស់កូរ៉េខាងជើង ដែលជាវិធានការទប់ទល់របស់ពួកគេយ៉ាងណាក៏ដោយ តែវានឹងមិនធ្វើឲ្យយើងភ័យខ្លាច ឬកែប្រែជំហរធ្វើអ្វីខុសពីមុនទ្បើយ»។

ក្នុងនោះលោកបានហៅការដាក់ទណ្ឌកម្មនោះថា «ជាអំពើសាហាវយង់ឃ្នង និងឃោឃៅបំផុត» ៕

ចែកចាយបន្ត