Post News Media ព័ត៌មានអន្តរជាតិ កូរ៉េខាងជើង៖ ...

កូរ៉េខាងជើង៖ អាមេរិក កំពុងហ្វឹកហ្វឺនទម្លាក់គ្រាប់បែកនុយក្លេអ៊ែរ នៅកូរ៉េខាងត្បូង

ចែកចាយបន្ត

កូរ៉េ: រដ្ឋាភិបាលក្រុងព្យុងយ៉ាង នៅថ្ងៃអង្គារនេះ បាននិយាយថា យោធាអាមេរិកកាលពីថ្ងៃច័ន្ទ បានហ្វឹកហ្វឺនទម្លាក់គ្រាប់បែកនុយក្លេអ៊ែរមួយ នៅក្នុងប្រទេសកូរ៉េខាងត្បូង ដែលមានគោលដៅមកលើកូរ៉េខាងជើង និងបានហៅវាថា ជាសកម្មភាពដ៏រឹងទទឹងមួយ ដើម្បីចង់ឲ្យមានសង្គ្រាមនុយក្លេអ៊ែរនៅលើឧបទ្វីបកូរ៉េ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី០២ ខែឧសភា ឆ្នាំ២០១៧។

កាលពីថ្ងៃទី១ ខែឧសភា ក្រុមចក្រពត្តិនិយមអាមេរិក បានប្តេជ្ញាចិត្តបន្ថែមទៀត ក្នុងការប្រើប្រាស់កម្លាំងយោធា ដោយការហ្វឹកហ្វឺនទម្លាក់គ្រាប់បែកនុយក្លេអ៊ែរ ដើម្បីប្រឆាំងនឹងសកម្មភាពគឃ្លើនរបស់កូរ៉េខាងជើង ជាមួយនឹងយន្តហោះទម្លាក់គ្រាប់បែក B-1B នៅក្នុងសមយុទ្ធរួមគ្នាជាមួយកូរ៉េខាងត្បូង ដែលហៅឈ្មោះថា Key Resolve និង Foal Eagle ។

ទីភ្នាក់ងារ​សារព័ត៌មាន​រដ្ឋ​កូរ៉េខាងជើង KCNA បាន​ឲ្យ​ដឹង​ថា «យន្តហោះទម្លាក់គ្រាប់បែកនេះ មក​ពីកោះ Guam បាន​ហោះ​នៅ​លើ​ផ្ទៃ​មេឃ នៃ​សមុទ្រ​ខាងកើត និង​បាន​ចូលរួម​ប្រតិបត្តិការ ជាមួយ​នឹង​បំណង​វាយប្រហារ ដោយ​ក្នុង​នោះ​រួម​មាន​ទាំងនាវា​ដឹក​យន្តហោះ​ចម្បាំង USS Carl Vinson និង នាវាមុជទឹក USS Michigan ទៀត​ផង»។

សូមជំរាបថា ភាពតានតឹងកាន់តែខ្លាំងទ្បើង នៅឧបទ្វីកូរ៉េ ក្នុងរយ:ពេលពីរខែកន្លងមក រវាងអាមេរិក និងកូរ៉េខាងជើង ដោយក្រុងវ៉ាស៊ីនតោត បានគំរាមកំហែងវាយប្រហារ ដោយប្រើកម្លាំងយោធាលើក្រុងព្យុងយ៉ាង ជុំវិញកម្មវិធីនុយក្លេអ៊ែរ និងមីស៊ីលរបស់ប្រទេសនេះ៕