Post News Media ព័ត៌មានអន្តរជាតិ នៅថ្ងៃនេះកូរ៉...

នៅថ្ងៃនេះកូរ៉េខាងត្បូង នឹងបោះឆ្នោតជ្រើសរើសប្រធានាធិបតីថ្មី

ចែកចាយបន្ត

កូរ៉េ: ប្រជាជនកូរ៉េខាងត្បូង នឹងត្រូវទៅបោះឆ្នោត ដើម្បីជ្រើសរើសប្រធានថ្មី នៅថ្ងៃអង្គារនេះ ចំពេលមានការព្រួយបារម្ភអំពីបញ្ហាសេដ្ឋកិច្ច អំពើពុករលួយ និងទំនាក់ទំនងរបស់ពួកគេជាមួយកូរ៉េខាងជើង។ ការប្រញាប់បោះឆ្នោតមុនពេលកំណត់នេះ ត្រូវបានធ្វើទ្បើង បន្ទាប់ពីលោកស្រី ផាក គឺនហេ ដែលជាប្រធានាធិបតី ស្ត្រីដំបូងរបស់ប្រទេសនេះ ត្រូវបានសភា និងតុលាការធម្មនុញ្ញទម្លាក់ចេញពីតំណែង ដោយសារតែរឿង​អាស្រូវ​ពុក​រលួយ។ នេះបើយោងតាមរយ: សារព័ត៌មាន CNN ចេញផ្សាយនៅថ្ងៃ០៩ ខែឧសភា ឆ្នាំ២០១៧។

អ្នកបោះឆ្នោតជាច្រើន បាននិយាយថា ពួកគេមានការខឹងសម្បាយ៉ាងខ្លាំងពាក់ព័ន្ធនឹងរឿងអាស្រូវពុករលួយ របស់លោកស្រី ផាក ដែលលោកស្រីធ្លាប់ត្រូវបានគេចាត់ទុកថា «ជាព្រះនាងរបស់ប្រជាជន» ហើយនៅពេលនេះដែរ ពួកគេក៏បានត្រៀមខ្លួនជាស្រេច សម្រាប់ការបោះឆ្នោតដ៏មានតម្លាភាពនេះ។ លោក John Delury សាស្រ្តាចារ្យ នៅសាកលវិទ្យាល័យ Yonsei បានឲ្យដឹងថា ការបោះឆ្នោតនេះ គឺចង់ដាក់ទោសដល់គណបក្សទាំងមូល ដែលគ្រប់គ្រងមិនបានល្អ នៅសម័យលោកស្រី ផាក»។

សម្រាប់ការបោះឆ្នោតប្រធានាធិបតីថ្មីកូរ៉េខាងត្បូង គឺមានបេក្ខជនចំនួន៥រូប ដែលបានឈរឈ្មោះ មានដូចជា លោក Moon Jae-in, លោក​ Hong Joon-pyo, លោក Ahn Cheol-soo លោក Yoo Seong-min និងលោកស្រី Sim Sang-jeung ជាមួយគ្នានោះដែរ បើតាមការស្ទង់មតិជាច្រើន នៅក្នុងចំណោមបេក្ខជនទាំង៥រូប គេ​សង្កេត​ឃើញថា លោក Moon Jae in មកពីគណបក្សប្រជាធិបតេយ្យ គឺមានលទ្ធភាពខ្ពស់ជាងគេ ដែលអាចនឹង​ជាប់​ឆ្នោត​ជា​ប្រធានាធិបតី។

សូមជំរាបថា បើសិនជាលោក Moon ពិតជាជាប់​ឆ្នោត​មែន​នោះ លោក អាចនឹងធ្វើឲ្យនយោបាយ​កូរ៉េ​ខាង​ត្បូង ចំពោះកូរ៉េខាងជើង និងអាមេរិក ផ្លាស់ប្ដូរទាំងស្រុង។

គួរបញ្ជាក់ដែរថា មានមនុស្សជាង ១១ លាននាក់ ដែលប្រហែលជា ២៦% នៃអ្នកបោះឆ្នោតសរុប បានទៅចូលរួម នៅក្នុងការបោះឆ្នោតរួចហើយ នេះបើយោងតាមគណ:កម្មាធិការបោះឆ្នោតជាតិ៕