Post News Media ព័ត៌មានអន្តរជាតិ បាក់ជញ្ជាំងសា...

បាក់ជញ្ជាំងសាលអាពាហ៍ពិពាហ៍គូស្នេហ៍មួយគូ ឆក់យកជីវិតមនុស្ស ២៤ នាក់ និងរបួស ២៨ នាក់ នៅឥណ្ឌា

ចែកចាយបន្ត

ឥណ្ឌា: មន្ត្រីប៉ូលិសជាន់ខ្ពស់ ក្នុងប្រទេសម្នាក់ នៅថ្ងៃព្រហស្បតិ៍នេះ បានឲ្យដឹងថា យ៉ាងហោចណាស់មនុស្ស ២៤ នាក់ បានស្លាប់ និង ២៨ នាក់ទៀតរងរបួស នៅក្នុងហេតុការណ៍បាក់រលំ ជញ្ជាំងសាលមួយ ដែលបង្កឡើងដោយសារភ្លៀងធ្លាក់យ៉ាងខ្លាំង នៅរដ្ឋ Rajasthan ភាគខាងលិចប្រទេស។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី១១ ខែឧសភា ឆ្នាំ២០១៧។

ប្រធានប៉ូលិសស្រុក លោក Anil Tank បាននិយាយថា «ហេតុការណ៍នេះ បានកើតឡើងនៅវេលាម៉ោង ១០ និង៣០ នាទីយប់ (ម៉ោងក្នុងស្រុក) កាលពីថ្ងៃពុធ នៅឯសាលអាពាហ៍ពិពាហ៍មួយ នៅលើផ្លូវ Sevar ក្នុងស្រុក Bharatpur ដែលជាកន្លែងមានចំនួនមនុស្សយ៉ាងច្រើន​ បាននាំគ្នាមកចូលរួម ក្នុងពិធីអាពាហ៍ពិពាហ៍របស់ គូស្នេហ៍មួយគូ»។

លោកបានបន្ថែមថា «មានភ្លៀងធ្លាក់យ៉ាងខ្លាំង បានវាយប្រហារនៅតំបន់ទីនោះ ក៏ស្រាប់តែបង្កឲ្យមានការដួលរលំ នៃជញ្ជាំងសាល ខណ:ដែលអ្នកទាំងនោះ កំពុងជ្រកក្រោមទីជំរកមួយ ក្បែរជញ្ជាំងសាល ដើម្បីការពារខ្លួនពីការទទឹក ជោកដោយភ្លៀងធ្លាក់»។

ពាក់ព័ន្ធនឹងឧប្បត្តិហេតុនេះ ប្រធានប៉ូលិសរដ្ឋ លោក Vasundhara Raje បានបញ្ជាឲ្យក្រុមមន្ត្រី បើកការស៊ើបអង្កេតផងដែរ៕