Post News Media ព័ត៌មានអន្តរជាតិ សង្គ្រាមរដ្ឋា...

សង្គ្រាមរដ្ឋាភិបាល ជាមួយពួក ISIS បង្កឲ្យមនុស្សជាង ២០០.០០០ នាក់ រត់ភៀសខ្លួនចេញពីទីក្រុង Mosul

ចែកចាយបន្ត

អ៊ីរ៉ាក់: បើតាមអង្គការសហប្រជាជាតិ បានឲ្យដឹងថា មនុស្សជាង ២០០.០០០ នាក់ហើយ បានរត់ភៀសខ្លួនចេញពីទីក្រុង Mosul បន្ទាប់ពីកងកម្លាំងអ៊ីរ៉ាក់ វាយលុកចូលទៅក្នុងស្រុក ដែលកាន់កាប់ ដោយរដ្ឋអ៊ីស្លាមនៃប្រទេសអ៊ីរ៉ាក់ និងក្រុម Levant ។ នេះបើយោងតាមរយ: សារព័ត៌មាន aljazeera ចេញផ្សាយនៅថ្ងៃទី១៩ ខែឧសភា ឆ្នាំ២០១៧។

តាមរបាយការណ៍មនុស្សជិត ៧០០.០០០ នាក់ បានរត់ភៀសខ្លួនចេញពីទីក្រុង Mosul ដើម្បីស្វែងរកសិទ្ធិជ្រកកោន ជាមួយមិត្តភក្តិ និងសាច់ញាតិ ឬនៅក្នុងជំរំជាដើម ចាប់តាំងពីការចាប់ផ្តើមវាយលុកដណ្ដើមយកតំបន់ក្នុងទីក្រុង របស់កងកម្លាំងរដ្ឋាភិបាលពីរដ្ឋអ៊ីស្លាមមកគ្រប់គ្រងវិញ កាលពីខែតុលាកន្លងទៅ។

នៅក្នុងសេចក្តីថ្លែងការណ៍មួយរបស់លោក Lise Grande ជា​អ្នក​សម្រប​សម្រួល​មនុស្ស​ធម៌​នៃ​អង្គការសហប្រជាជាតិនៅ​អ៊ីរ៉ាក់ កាលពីថ្ងៃព្រហស្បតិ៍ បាននិយាយថា «ការបង្កើនប្រតិបត្តិការប្រយុទ្ធខ្លាំងទ្បើង និងការផ្លាស់ទីរបស់យោធា ខិតទៅជិតតំបន់ទីក្រុងចាស់ Mosul យើងរំពឹងថា អាចនឹងមានមនុស្សរត់ភៀសខ្លួនចេញ រហូតដល់ទៅ ២០០.០០០ នាក់ឯណោះ ។

ចំនួននៃការផ្លាស់ទីរបស់ប្រជាជននៅពេលនេះ គឺមានទំហំធំ ដែលវានឹងបង្កផលវិបាកកាន់តែច្រើនទ្បើងថែមទៀត ក្នុងការធានាដល់ជនស៊ីវិលទទួលបាននូវជំនួយ និងការការពារពួកគេ»។

អង្គការឃ្លាំមើលសិទ្ធិមនុស្ស បាននិយាយថា កងកម្លាំងអ៊ីរ៉ាក់ និងមន្ត្រីសន្តិសុខក្នុងតំបន់ផ្សេងទៀត បានបង្ខំឲ្យពលរដ្ឋជាង ៣០០ គ្រួសារវិលត្រឡប់ទៅស្រុកក្នុងទីក្រុង Mosul វិញ ខណ:ដែលទីនោះ នៅតែមានហានិភ័យនៃការវាយប្រហារដោយយុទ្ធជនក្រុម ISIS ៕