Post News Media ព័ត៌មានអន្តរជាតិ កូរ៉េខាងជើងបា...

កូរ៉េខាងជើងបាញ់ផ្លោងមីស៊ីលថ្មីមួយទៀត មិនស្គាល់អត្តសញ្ញាណ

ចែកចាយបន្ត

កូរ៉េ: ក្រុងព្រុងយ៉ាង នៅថ្ងៃច័ន្ទនេះ បានបាញ់បង្ហោះមីស៊ីលផ្លោងថ្មីមួយទៀត មានរយ:ចម្ងាយខ្លី ដែលវាបានធ្លាក់ចូលនៅឆ្នេរសមុទ្រភាគខាងកើតប្រទេសរបស់ខ្លួន ដោយយោធាកូរ៉េខាងត្បូង បាននិយាយថា ការធ្វើតេស្តមីស៊ីលជាបន្តបន្ទាប់ចុងក្រោយនេះ ជាការដាក់សម្ពាធ និងគំរាមកំហែងដល់ទណ្ឌកម្មបន្ថែមទៀត របស់ពិភពលោក។ នេះបើយោងតាមរយ: សារព័ត៌មាន Channel news Asia ចេញផ្សាយនៅថ្ងៃទី ២៩ ខែឧសភា ឆ្នាំ២០១៧។

ការិយាល័យកូរ៉េខាងត្បូងនៃអគ្គសេនាធិការចម្រុះ បានឲ្យដឹងក្នុងសេចក្តីថ្លែងការណ៍មួយថា ការធ្វើតេស្តថ្មីនេះ បានធ្វើឲ្យប្រធានាធិបតីលោក Moon Jae-in អំពាវនាវឲ្យរៀបចំកិច្ចប្រជុំមួយ នៅក្រុមប្រឹក្សាសន្តិសុខជាតិភ្លាមៗ នៅវេលាម៉ោង ៧ និង ៣០ នាទីព្រឹក (ម៉ោងក្នុងស្រុក) ។

មីស៊ីលដែលបាញ់នោះ ត្រូវបានគេជឿថា ជាមីស៊ីលផ្លោង Scud អាចហោះបានរយ:ចម្ងាយប្រហែល ៤៥០ គីឡូម៉ែត្រ ហើយបើតាមអគ្គសេនាធិការចម្រុះកូរ៉េខាងត្បូង បានលើកទ្បើងថា កូរ៉េខាងជើង មានឃ្លាំងមីស៊ីល Scud ដ៏ធំ ដែលបានបង្កើតឡើងដំបូងដោយសហភាពសូវៀត។

គួរបញ្ជាក់ដែរថា សម្រាប់ការធ្វើកំណែទម្រង់នៃមីស៊ីលនេះ អាចឲ្យវាហោះបានក្នុងរយ:ចម្ងាយរហូតដល់ ១,០០០ គីឡូម៉ែត្រឯណោះ៕