Post News Media ព័ត៌មានអន្តរជាតិ លោក​រដ្ឋ​មន្ត...

លោក​រដ្ឋ​មន្ត្រី​ Sessions អះអាងថា ការឃុបឃិតគ្នាជាមួយរុស្ស៊ី ជារឿងកុហកដ៏គួរឲ្យស្អប់ខ្ពើមបំផុត

ចែកចាយបន្ត

អាមេរិក: លោក​រដ្ឋ​មន្ត្រី​ក្រសួង​យុត្តិធម៌ លោក Jeff Sessions​ បានច្រានចោលទៅនឹង ការលើកទ្បើងថា លោកបានស៊ុមគ្រលុំជាមួយរុស្ស៊ី នៅក្នុងយុទ្ធនាការបោះឆ្នោតរបស់លោក ដូណាល់ ត្រាំ កាលពីឆ្នាំមុន ដោយបានហៅការចោទប្រកាន់មួយនេះថា ជារឿងដ៏តក់ស្លុត និងកុហកគួរឲ្យស្អប់ខ្ពើមជាទីបំផុត។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៤ ខែមិថុនា ឆ្នាំ២០១៧។

ថ្លែងនៅ​ក្នុង​សវនាការរបស់សភា លោក Sessions​ បានថ្កោលទោសយ៉ាងខ្លាំង ចំពោះការចោទប្រកាន់ថា លោកបានប្រព្រឹត្ដមិនត្រឹមត្រូវ ក្នុងអំឡុងពេលនៃការជួបប្រជុំគ្នាជាបន្តបន្ទាប់ជាមួយមន្ត្រីរុស្ស៊ី ឬក៏ថា លោកបានដឹងពីការប៉ុនប៉ងឃុបឃិតគ្នា ដោយសមាជិកនៃក្រុមយុទ្ធនាការរបស់លោក ត្រាំនោះ។

ក្នុងនោះដែរ លោក Sessions​ បានប្រាប់សវនាការនៃគណ:កម្មាធិការចារកម្មព្រឹទ្ធសភាថា « ខ្ញុំមិនដែលបានជួប ឬមានការសន្ទនាណាមួយ ជាមួយមន្ត្រីការបរទេសរុស្ស៊ី ឬក៏ទាក់ទងចូលនឹងការជ្រៀតជ្រែកយុទ្ធនាការណាមួយ នៅក្នុងការបោះឆ្នោតសហរដ្ឋអាមេរិកឡើយ»។

ដោយលោកបានបន្ថែមថា «ខ្ញុំមិនមានចំណេះដឹងបែបសន្ទនាណាមួយ ដោយបានជាប់ទាក់ទងនឹងនរណាម្នាក់ នៅក្នុងយុទ្ធនាការរបស់លោក ត្រាំ ទេ»។

សូមជំរាបថា សវនាការ​របស់​គណ:កម្មាធិការ​ខាង​ស៊ើបការណ៍​សម្ងាត់​របស់​ព្រឹទ្ធ​សភា​សអាមេរិក ​ជា​ជំហាន​ថ្មីៗ​បំផុត ​នៅ​ក្នុង​ការ​ស៊ើបអង្កេត​ជាច្រើន​ ដែល​កំពុង​មាន​អំពី​ការ​ជ្រៀត​ជ្រែក​របស់​រុស្ស៊ី​ ក្នុង​ការ​បោះឆ្នោត​ប្រធានាធិបតី​អាមេរិក​កាល​ពី​ឆ្នាំ​មុន៕