Post News Media ព័ត៌មានអន្តរជាតិ យន្តហោះ Boein...

យន្តហោះ Boeing 737 ជួបបញ្ហាអំទ្បុងពេលហោះហើរ បណ្ដាលឲ្យរងរបួសអ្នកដំណើរជាច្រើននាក់

ចែកចាយបន្ត

អាមេរិក: យ៉ាងហោចណាស់អ្នកដំណើរ ១០ នាក់ ដែលជិះនៅលើយន្ដហោះរបស់ក្រុមហ៊ុន United Airlines បានទទួលរងរបួស អំទ្បុងពេលយន្តហោះជួបភាពចលាចល នៅពេលហោះហើរចេញពី ប្រទេសប៉ាណាម៉ា ទៅកាន់ទីក្រុងហ៊ូស្តុន នៃរដ្ឋតិចសាស់។ នេះបើយោងតាមសារព័ត៌មាន ABC News ចេញផ្សាយនៅថ្ងៃទី២១ ខែមិថុនា ឆ្នាំ២០១៧។

អ្នកនាំពាក្យរដ្ឋបាលអាកាសចរណ៍សហព័ន្ធ បាននិយាយថា យន្តហោះ Boeing 737 បានជួបនឹងភាពចលាចល នៅចម្ងាយប្រហែល ៨០ ម៉ៃល៍ពីទីក្រុង Cancun ប្រទេសម៉ិកស៊ិក។ តាមរូបភាពផ្កាយរណប បានបង្ហាញថា មានព្យុះពពកនៅក្នុងតំបន់នោះ បន្ទាប់ពីទទួលរងការវាយប្រហារដោយព្យុះត្រូពិចស៊ីនឌី។

ក្រុមអ្នកសង្គ្រោះបន្ទាន់ ត្រូវបានគេបញ្ជូនទៅកាន់ព្រលានយន្តហោះអន្តរជាតិ George Bush ក្នុងទីក្រុងហូស្តុនភ្លាមៗ ជាកន្លែងដែលយន្តហោះបានចុះចតដោយសុវត្ថិភាព កាលពីរសៀលថ្ងៃអង្គារ។

អ្នកនាំពាក្យរបស់ក្រុមហ៊ុន United Airlines បាននិយាយថា អ្នកដំណើរ ៩ នាក់ និងសមាជិកនាវិកម្នាក់ ត្រូវបានបញ្ជូនទៅមន្ទីរពេទ្យ ប៉ុន្តែមិនទាន់ដឹងអំពីស្ថានភាពយ៉ាងណានោះទេ៕