Post News Media ព័ត៌មានអន្តរជាតិ លោក ត្រាំ និង...

លោក ត្រាំ និងលោក ពូទីន ជួបពិភាក្សាគ្នារឿងលួចបន្លំចូលការបោះឆ្នោតអាមេរិក នៅឯក្រៅកិច្ចប្រជុំ G20 ជាលើកដំបូង

ចែកចាយបន្ត

អាល្លឺម៉ង់: ប្រធានាធិបតីអាមេរិកលោក ដូណាល់ ត្រាំ និងប្រធានាធិបតីរុស្ស៊ីលោក វ្ល៉ាឌីមៀរ ពូទីន បានពិភាក្សាគ្នាអំពីការលួចជ្រៀតជ្រែកចូលរបស់រុស្ស៊ី ទៅក្នុងប្រព័ន្ធបោះឆ្នោតប្រធានាធិបតីអាមេរិក កាលពីឆ្នាំមុន នៅអំឡុងពេលជំនួបដំបូងរបស់ពួកគេ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី០៨ ខែកក្កដា ឆ្នាំ២០១៧។

ជាមួយគ្នានេះដែរ រដ្ឋមន្ត្រីការបរទេសអាមេរិកលោក Rex Tillerson បានពិពណ៌នាថា នៅក្នុងជំនួបរបស់មេដឹកនាំទាំងពីរនេះ នឹងមានការផ្លាស់ប្តូរដ៏រឹងមាំ។

ឆ្លើយតបទៅនឹងរឿងលួចបន្លំចូលទៅក្នុងប្រព័ន្ធបោះឆ្នោតអាមេរិក រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា « លោក ត្រាំ បានទទួលការអះអាងរបស់លោក ពូទីន រួចហើយថា ប្រទេសរុស្ស៊ី មិនប្រព្រឹត្តិវានោះទេ។

ប៉ុន្តែពាក់ព័ន្ធបញ្ហានេះដែរ លោក Tillerson បាននិយាយថា «វានៅមិនទាន់ច្បាស់ទេ ថាតើប្រទេសទាំងពីរ នឹងឈានដល់កិច្ចព្រមព្រៀងមួយ ស្តីពីអ្វីដែលបានកើតឡើងនោះ»។

ដោយលោកបានបន្ថែមថា «ខ្ញុំគិតថា ការពិភាក្សារបស់ប្រធានាធិបតីទាំងពីរ ប្រហែលជាកំពុងផ្តោត ទៅលើចំណុចអ្វីមួយ ដែលយើងមានការខ្វែងគំនិតគ្នា និងមិនអាចដោះស្រាយបានកន្លងមក ក៏ថាបាន »។

គួរបញ្ជាក់ដែរថា ប្រធានាធិបតីអាមេរិក និងរុស្ស៊ី បានជួបភិក្សាគ្នាជាលើកដំបូងរបស់ខ្លួន នៅខាងក្រៅកិច្ចប្រជុំកំពូល G20 នៅក្នុងទីក្រុងហាំប៊ឺក ប្រទេសអាឡឺម៉ង់ ដែលបានធ្វើឡើងចំពេលមានការតវ៉ាដោយអំពើហិង្សា ក្នុងប្រទេសនេះផងដែរ៕