តៃវ៉ាន់ៈ តាមរបាយការណ៍ព័ត៌មាន Liberty Times កាលពីថ្ងៃព្រហស្បតិ៍ បានឲ្យដឹងថា ជប៉ុន និងកោះតៃវ៉ាន់ បានបញ្ចេញយន្តហោះចម្បាំងខ្លួនភ្លាមៗ បន្ទាប់ពីក្រុមយន្តហោះទម្លាក់គ្រាប់ចិន បានហោះហើរឆ្វាចដែនអាកាស នៅលើតំបន់ប៉ាស៊ីហ្វិកភាគខាងលិច។ នេះបើយោងតាមសារព័ត៌មាន UPI ចេញផ្សាយនៅថ្ងៃទី២២ ខែកក្កដា ឆ្នាំ២០១៧។
​
ប្រភពដដែរ បានបន្ថែមថា វត្តមានយន្តហោះចម្បាំងចិន បានហោះហើរចេញពីសមុទ្រចិនខាងកើត ឆ្ពោះទៅតំបន់ប៉ាស៊ីហ្វិកភាគខាងលិច គឺដើម្បីធ្វើសមយុទ្ធមួយ ដែលទំនងជាធ្វើទ្បើង ដើម្បីព្រមានដល់កោះតៃវ៉ាន់ និងជប៉ុន។

បច្ចុប្បន្នរដ្ឋាភិបាលទីក្រុងប៉េកាំង កំពុងមានជម្លោះដែនទឹកជាមួយទីក្រុងតូក្យូ ដោយអះអាងថា កោះ Senkaku គ្រប់គ្រងពីសំណាក់រដ្ឋាភិបាលជប៉ុន គឺជាដែនទឹករបស់ខ្លួន។

គួរបញ្ជាក់ដែរថា យន្តហោះទម្លាក់គ្រាប់យុទ្ធសាស្ត្រ Xian H-6 ចំនួន៨គ្រឿង និងយន្តហោះគ្មានមនុស្សបើក Shaanxi Y-8 ចំនួន២គ្រឿងរបស់ចិន មិនត្រឹមតែបានហោះហើរឆ្លងកាត់ដែនអាកាស នៅជិតកោះតៃវ៉ាន់ប៉ុណ្ណោះទេ ប៉ុន្តែថែមទាំងបានធ្វើដំណើរឆ្លងកាត់ Miyako Strait ជាសមុទ្រ​រវាង​កោះ Miyako និង Okinawa នៃ​ប្រទេស​ជប៉ុនទៀតផង ដែលជាហេតុបង្កឲ្យជប៉ុន និងកោះតៃវ៉ាន់ បានបញ្ចេញយន្តចម្បាំងខ្លួនភ្លាមៗ ដើម្បីឆ្លើយតបទៅនិងសកម្មភាពនេះដែរ៕