Post News Media ព័ត៌មានអន្តរជាតិ លោក ត្រាំ៖ វា...

លោក ត្រាំ៖ វានឹងជាថ្ងៃសោកសៅបំផុត សម្រាប់កូរ៉េខាងជើង ប្រសិនបើយោធាអាមេរិកវាយប្រហារ

ចែកចាយបន្ត

អាមេរិក: ប្រធានាធិបតីអាមេរិកលោក ដូណាល់ ត្រាំ បាននិយាយថា ការវាយប្រហារមួយ ពីសំណាក់យោធាអាមេរិក ទៅលើប្រទេសកូរ៉េខាងជើង គឺជៀសមិនរួចនោះទ្បើយ ហើយវានឹងជាថ្ងៃដ៏សោកសៅបំផុត សម្រាប់ប្រទេសអាស៊ីមួយនេះ ដែលមិនធ្លាប់មានពីមុនមក។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី០៨ ខែកញ្ញា ឆ្នាំ២០១៧។

ថ្លែងក្នុងសន្និសិទសារព័ត៌មាន នៅឯសេតវិមាន បន្ទាប់ពីជួបជាមួយមេដឹកនាំប្រទេសកូវ៉ែត កាលពីថ្ងៃព្រហស្បតិ៍ លោក ត្រាំ បាននិយាយថា «កូរ៉េខាងជើង កំពុងប្រព្រឹត្តទង្វើយ៉ាងអាក្រក់បំផុត ហើយរបបមួយនេះ ត្រូវតែបញ្ឈប់វាជាដាច់ខាត»។

ក្នុងនោះលោកបានបន្ថែមថា «សកម្មភាពយោធា ប្រាកដណាស់ថា ជាជម្រើសមួយ ដែលមិនអាចជៀសវាងបាន តែយើងក៏សង្ឃឹមដែរថា នឹងមិនប្រើវា ទៅលើកូរ៉េខាងជើងទ្បើយ ព្រោះប្រសិនបើយើងអនុវត្តមែននោះ វានឹងក្លាយទៅជាថ្ងៃដ៏សោកស្តាយបំផុត សម្រាប់កូរ៉េខាងជើង»។

សូមជំរាបថា​ កូរ៉េខាងជើង បានបាញ់សាកល្បងអាវុធនុយក្លេអ៊ែរលើកទី៦ ដ៏មានឥទ្ធិពលបំផុតរបស់ខ្លួន កាលពីថ្ងៃទី២ ខែកញ្ញាកន្លងទៅ ដោយក្រុងព្យុងយ៉ាង បានអះអាងថា វាជាគ្រាប់បែកអ៊ីដ្រូសែន សម្រាប់បំពាក់លើមីស៊ីល រយ:ចម្ងាយឆ្ងាយ ខណ:ដែលវាបានបង្កឲ្យមានប្រឈមមុខដាក់គ្នា កាន់តែខ្លាំងទ្បើង ជាមួយរដ្ឋបាលលោក ត្រាំ និងសម្ព័ន្ធមិត្តរបស់អាមេរិក៕

ចែកចាយបន្ត