Post News Media ព័ត៌មានអន្តរជាតិ អាមេរិក កំពុង...

អាមេរិក កំពុងស៊ើបអង្កេតពីឆន្ទ:របស់កូរ៉េខាងជើង ថាតើរបបមួយនេះ មានបំណងចង់ធ្វើកិច្ចចរចាដែរឬទេ?

ចែកចាយបន្ត

អាមេរិក: រដ្ឋមន្ត្រីការបរទេសអាមេរិក លោក Rex Tillerson បាននិយាយកាលពីថ្ងៃសៅរ៍ថា រដ្ឋបាលខ្លួនកំពុងស្ថិត​ក្នុង​ការទាក់ទងគ្នាដោយផ្ទាល់ ជាមួយរដ្ឋាភិបាលក្រុងព្យុងយ៉ាង ថាតើពួកគេមានបំណងចង់ពិភាក្សាអំពីការលុបបំបាត់កម្មវិធីអាវុធនុយក្លេអ៊ែររបស់ខ្លួន ដែរឬយ៉ាងណា។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី០១ ខែតុលា ឆ្នាំ២០១៧។

ប៉ុន្តែពាក់ព័ន្ធនឹងបញ្ហានេះ ការិយាល័យរបស់លោក នៅរដ្ឋធានីវ៉ាស៊ីនតោន បានបញ្ជាក់ភ្លាមៗផងដែរថា កូរ៉េខាងជើងមិនបង្ហាញពីចំណាប់អារម្មណ៍ ចំពោះការពិភាក្សាបែបនេះទេ។

ថ្លែងប្រាប់ទៅក្រុមអ្នកសារព័ត៌មាន បន្ទាប់ពីជំនួបចរចា ជាមួយប្រធានាធិបតីចិនលោក ស៊ី ជីនពីង (Xi Jinping) អ្នកការទូតជាន់ខ្ពស់ លោក Tillerson បាននិយាយថា មន្ត្រីអាមេរិក កំពុងទាក់ទងជាមួយក្រុងព្យុងយ៉ាង។

ការថ្លែងយ៉ាងដូច្នោះ បានធ្វើឡើងបន្ទាប់ពីសង្រ្គាមពាក្យសម្ដីរវាងប្រធានាធិបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន កាន់តែមានភាពតានតឹងដាក់គ្នាខ្លាំងទ្បើង ដោយលោក Tillerson បានចេញសេចក្តីអំពាវនាវឲ្យរក្សាភាពស្ងប់ស្ងាត់រវាងប្រទេសទាំងពីរ៕