Post News Media ព័ត៌មានអន្តរជាតិ លោក ត្រាំ និង...

លោក ត្រាំ និងស្ត្រីទី១អាមេរិកលោកស្រី មេទ្បានី ត្រាំ ធ្វើដំណើរទស្សនកិច្ចនៅទីក្រុងឡាសវេហ្គាស ជាកន្លែងសម្លាប់មនុស្សយ៉ាងរង្គាល ដោយការបាញ់ប្រហារ

ចែកចាយបន្ត

អាមេរិក: ប្រធានាធិបតីអាមេរិក លោក ដូណាល់ ត្រាំ បានធ្វើដំណើរទស្សនកិច្ច នៅឡាសវេហ្គាស កាលពីថ្ងៃពុធបន្ទាប់ពីទីក្រុងមួយនេះ ត្រូវបានរង្គោះរង្គើដោយការបាញ់ប្រហារដ៏សាហាវបំផុត ក្នុងប្រវត្តិសាស្ត្រអាមេរិក ដែលបានសម្លាប់មនុស្ស ៥៩ នាក់ និង ៥២៧ នាក់ទៀតរងរបួស។ នេះបើយោងតាមរយ:សារព័ត៌មានចិនស៊ិនហួ ចេញផ្សាយនៅថ្ងៃទី០៥ ខែតុលា ឆ្នាំ២០១៧។

លោក ត្រាំ និងស្ត្រីទី១របស់អាមេរិកលោកស្រី មេទ្បានី ត្រាំ បានធ្វើដំណើរទៅកាន់មជ្ឈមណ្ឌលវេជ្ជសាស្ត្រ នៃសាកលវិទ្យាល័យ Southern Nevada សម្រាប់ដំណើរទស្សនកិច្ចឯកជនមួយ ដើម្បីសួរសុខទុកអ្នកជំងឺ និងអ្នកជំនាញវេជ្ជសាស្ត្រនៅទីនោះ បន្ទាប់ពីករណីបាញ់ប្រហារដ៏ធំមួយ សម្លាប់មនុស្សយ៉ាងរង្គាល នៅក្នុងរដ្ឋអាមេរិក។

ថ្លែងទៅកាន់អ្នកយកព័ត៌មាន នៅក្នុងបន្ទប់រង់ចាំរបស់សាកលវិទ្យាល័យ មជ្ឈមណ្ឌលវេជ្ជសាស្ត្រ លោក ត្រាំ បាននិយាយថា លោកបានជួបជាមួយមនុស្សចំនួន ភាគច្រើនជាអ្នកដ៏អស្ចារ្យបំផុត ហើយលោកបានអញ្ជើញពួកគេ ឲ្យទៅជួបលោកនៅឯសេតវិមានផងដែរ។

សូមជំរាបថា ពាក់ព័ន្ធនឹងសំណួរអ្នកយកព័ត៌មាន ដែលចោទសួរមកកាន់ប្រធានាធិបតីថា តើអាមេរិក កំពុងកើតមានបញ្ហាអំពើហិង្សាដោយកាំភ្លើង ឬយ៉ាងណា? លោក ត្រាំ ក៏ធ្វើការច្រានចោលផងដែរ ដោយលោក គ្រាន់តែបាននិយាយថា «យើងនឹងមិននិយាយអំពីរឿងនេះ នៅថ្ងៃនេះទេ»៕