Post News Media ព័ត៌មានអន្តរជាតិ ​ថៃ កំពុង​ធ្វ...

​ថៃ កំពុង​ធ្វើសំណើ​បត្យាប័ន​លោកស្រី​យី​ង​ឡាក់​ពី​អង់គ្លេស​

ចែកចាយបន្ត

ថៃ: បន្ទាប់ពីប៉ូលិសបានបញ្ជាក់កាលពីថ្ងៃអង្គារថា អតីតនាយរដ្ឋមន្ត្រីថៃ លោកស្រី​ យី​ង​ឡាក់​ ស៊ីណា​វ៉ា​ បានស្ថិតនៅក្នុងប្រទេសអង់គ្លេសនោះ ក្រសួង​ទំនាក់ទំនង​អន្តរជាតិ​របស់​ការិយាល័យ​អគ្គ​រដ្ឋអាជ្ញា​ថៃ កំពុង​រៀបចំ​សំណើ​ ដើម្បី​ធ្វើ​បត្យាប័ន​លោកស្រី ដែល​បាន​រត់គេចខ្លួននេះមកវិញហើយ​។ នេះបើយោងតាមសារព័ត៌មាន Bangkok Post ចេញផ្សាយនៅថ្ងៃទី០៦ ខែតុលា ឆ្នាំ២០១៧។​

អគ្គ​រដ្ឋអាជ្ញា​ថៃលោក អំណត់ ចុ​ត​ចៃ​ បាន​និយាយកាលពី​ថ្ងៃ​ព្រហស្បតិ៍ថា លោកនឹង​ដឹកនាំ​ក្រុមការងារ​ រួមទាំង​ស្វែងរក​ក្រុម​អ្នកជំនាញ ដើម្បី​ធ្វើ​បត្យាប័ន​អតីតនាយករដ្ឋមន្ត្រីថៃ ដែលកំពុង​ស្ថិតនៅ​ទីក្រុង​ឡុង​ដ៍ និងបាន​ស្វែងរក​សិទ្ធិ​ជ្រកកោននៅទីនោះ។​

ក្នុងនោះលោក ក៏បានបញ្ជាក់ទៀតថា បើទោះបីការបង្កើត​ក្រុមការងារ​នេះ មិនទាន់​ទទួលបាន​សំណើ​ជា​ផ្លូវការ​ពី​ប៉ូលិស​ ដើម្បី​តាមរក​ចាប់ខ្លួន លោកស្រី​យី​ង​ឡាក់ ក៏ដោយ ​ប៉ុន្តែរូបលោក នឹង​ផ្តល់​ហេតុផល​សមស្របដល់ចំណាត់ការ​របស់ខ្លួន​ សម្រាប់កិច្ចការមួយនេះ ដោយអគ្គ​រដ្ឋអាជ្ញា បានលើកទ្បើងថា ​ករណី​របស់​លោកស្រី យី​ង​ឡាក់ គឺ​ជាប់​ពាក់ព័ន្ធ​នឹង​អំពើពុករលួយ​មិនមែន​នយោបាយ​នោះទេ​។

គួររំឭកថា ​លោកស្រី យី​ង​ឡាក់ បាន​រត់ភៀសខ្លួន​ចេញពី​ប្រទេស​ថៃ កាលពី​ចុងខែ​សីហាកន្លងទៅ គឺ​នៅ​មុនពេលដែលតុលាការ​ជាន់ខ្ពស់ថៃ បាន​ប្រកាស​សាលក្រម​ចុងក្រោយ​ ដែល​ជាប់ទាក់ទង​ទៅនឹង​គម្រោង​ទិញស្រូវ​អង្ករ​ដ៏​ចម្រូងចម្រាស់​ នៅអំទ្បុង​ការដឹកនាំរបស់រដ្ឋបាល​​លោកស្រី៕