Post News Media ព័ត៌មានអន្តរជាតិ កូរ៉េខាងត្បូង...

កូរ៉េខាងត្បូង អះអាងថា គ្រាប់បែកក្រាហ្វិចខ្លួន អាចវាយលុកបណ្តាញអគ្គិសនីកូរ៉េខាងជើង ក្នុងករណី​មាន​សង្គ្រាម​ផ្ទុះឡើង

ចែកចាយបន្ត

កូរ៉េ: ទីភ្នាក់ងារព័ត៌មានយ៉ុនហាប បានដកស្រង់សម្តីមន្ត្រីយោធាកូរ៉េខាងត្បូង ដែលបានលើកទ្បើងថា ប្រទេសខ្លួនបានបង្កើតបច្ចេកវិទ្យា ដើម្បីផលិតគ្រាប់បែកក្រាហ្វិច ដែលមានសមត្ថភាពអាចកាត់ផ្ដាច់ចរន្តអគ្គិសនីរបស់កូរ៉េខាងជើង ក្នុងករណីមានសង្គ្រាមផ្ទុះទ្បើង។ នេះបើយោងតាមសារព័ត៌មាន RT ចេញផ្សាយនៅថ្ងៃទី០៩ ខែតុលា ឆ្នាំ២០១៧។

គ្រប់បច្ចេកវិទ្យាទាំងអស់ ដែលប្រើសម្រាប់អភិវឌ្ឍគ្រាប់បែកក្រាហ្វិត ត្រូវបានដឹកនាំដោយទីភ្នាក់ងារការពារជាតិកូរ៉េខាងត្បូង ក្នុងគោលបំណងដើម្បីធានាសុវត្ថិភាព និងរក្សាសន្តិសុខក្នុងប្រទេស ដោយមន្ត្រីយោធាម្នាក់ បានប្រាប់ទីភ្នាក់ងារព័ត៌មានយ៉ុនហាប កាលពីថ្ងៃអាទិត្យថា បច្ចុប្បន្នគ្រាប់បែកក្រាហ្វិតនេះ គឺស្ថិតនៅក្នុងដំណាក់កាល ដែលកូរ៉េខាងត្បូងអាចបង្កើតវាបានគ្រប់ពេលវេលាណាក៏បាន។

សូមជំរាបថា គ្រាប់បែក​នេះ ធ្វើ​ពី​សរសៃ​ក្រា​ហ្វី​ត (graphite-​ធ្បូ​ង​ថ្ម​សុទ្ធ​ខ្មៅ​ទន់​) ហើយ​សំយោគ​ជាមួយ​សារធាតុ​គីមី ​ដើម្បី​បង្ក​ការ​កាត់ផ្តាច់​ចរន្ត ហើយ​បំផ្លាញ​ប្រព័ន្ធ​ចែកចាយ​អគ្គិសនីចោល​ទាំងស្រុង​នូវបណ្តាញ​អគ្គិសនី​របស់​កូរ៉េខាងជើង ។​

អាវុធនេះ ត្រូវបានបង្កើតឡើងដោយទីភ្នាក់ងារការពារជាតិកូរ៉េខាងត្បូង សម្រាប់ការអភិវឌ្ឃន៍លើវិស័យការពារជាតិ ជាផ្នែកមួយនៃកម្មវិធី Kill Chain របស់ក្រុងសេអ៊ូល ដើម្បីប្រឆាំងនឹងកូរ៉េខាងជើង៕