Post News Media ព័ត៌មានអន្តរជាតិ ប្រព័ន្ធការពា...

ប្រព័ន្ធការពារប្រឆាំងមីស៊ីលអាមេរិក កំពុងបង្កមហន្តរាយដល់ពិភពលោក ដែលនឹងជំរុញការប្រកួតប្រជែងផ្នែកសព្វាវុធថ្មី

ចែកចាយបន្ត

រុស្ស៊ី: ក្រសួងការពារជាតិរុស្ស៊ី បានឲ្យដឹងថា ប្រព័ន្ធការពារប្រឆាំងមីស៊ីលអាមេរិក ត្រូវបានរៀបចំទ្បើង ដើម្បីផ្តល់សមត្ថភាពដល់ទីក្រុងវ៉ាស៊ីនតោន ធ្វើការវាយប្រហារទូទាំងសកលលោក ដោយពុំមានការភ័យខ្លាចនឹងការសងសឹកត្រលប់មកវិញ ហើយវាក៏នឹងជំរុញឲ្យប្រទេសដទៃទៀត កសាង និងបង្កើនគ្រឿងសព្វាវុធរបស់ខ្លួនផងដែរ។ នេះបើយោងតាមសារព័ត៌មាន RT ចេញផ្សាយនៅថ្ងៃទី១៣ ខែតុលា ឆ្នាំ២០១៧។

អ្នកនាំពាក្យក្រសួងការពារជាតិ លោក Colonel Aleksandr Emelyanov បាននិយាយថា « ប្រព័ន្ធការពារប្រឆាំងមីស៊ីលអាមេរិក នឹងពង្រឹងឲ្យមានបង្កើនសមត្ថភាពមីស៊ីលនៅទូទាំងសកលលោក ដែលវានឹងជំរុញឲ្យមានការប្រកួតប្រជែងផ្នែកសព្វាវុធថ្មីផងដែរ។

ការថ្លែងយ៉ាងដូច្នេះ របស់លោកវរសេនីយ៍ឯករូបនេះ បានធ្វើទ្បើងនៅក្នុងសន្និសីទយោធារួមគ្នា រវាងរុស្ស៊ី និងចិន ដែលស្ថិតនៅខាងក្រៅកិច្ចប្រជុំមហាសន្និបាតរបស់គណ:កម្មាធិការអង្គការសហប្រជាជាតិ ស្តីពីការត្រួតពិនិត្យបញ្ហាសន្តិសុខអន្តរជាតិ និងការដកហូតអាវុធ។

ក្នុងនោះលោកបានបន្ថែមទៀតថា ប្រព័ន្ធការពារនេះ នឹងបង្កឲ្យមានការគំរាមកំហែងដល់មនុស្សជាតិ ដែលក្រុងវ៉ាស៊ីនតោន អាចនឹងតម្រង់គោលដៅវាយប្រហារទៅលើសត្រូវរបស់ខ្លួន នៅជុំវិញពិភពលោក ដែលវាអាចរួមមានទាំងរុស្ស៊ី និងចិនផងដែរ៕