កូរ៉េៈ រដ្ឋាភិបាលក្រុងសេអ៊ូល បានស្នើឲ្យមានកិច្ចចរចាកម្រិតខ្ពស់ ជាមួយក្រុងព្យុងយ៉ាង នៅថ្ងៃទី៩ ខែមករាខាងមុខ ដើម្បីពិភាក្សាគ្នាស្ដីពីការចូលរួមរបស់ពួកគេ នៅក្នុងការប្រកួតកីទ្បាអូឡាំពិក នារដូវរងារឆ្នាំ ២០១៨ ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២ ខែមករា ឆ្នាំ២០១៧។

ការស្នើឲ្យមានកិច្ចចរចានេះ បានកើតឡើងបន្ទាប់ពីមេដឹកនាំកំពូលកូរ៉េខាងជើង លោក គីម ជុងអ៊ុន បាននិយាយថា លោកកំពុងតែពិចារណា បញ្ជូនគណៈប្រតិភូមួយ ទៅកាន់ទីក្រុង Pyeongchang របស់ប្រទេសកូរ៉េខាងត្បូង សម្រាប់ព្រឹត្តិការណ៍ នៅខែកុម្ភៈខាងមុខ។

ដោយលោកបានបន្ថែមថា ភាគីទាំងពីរគួរតែជួបប្រជុំបន្ទាន់ ដើម្បីពិភាក្សាគ្នាអំពីលទ្ធភាព ដែលអាចធ្វើទៅបាន សម្រាប់ព្រឹត្តិការណ៍នេះ។

ពាក់ព័ន្ធនឹងបញ្ហានេះ ប្រធានាធិបតីកូរ៉េខាងត្បូង បាននិយាយថា លោកបានមើលឃើញការលើកទ្បើង របស់មេដឹកនាំក្រុងព្យុងយ៉ាងថា ជាឱកាសមួយ ដើម្បីកែលម្អទំនាក់ទំនង រវាងប្រទេសទាំងពីរ ដែលកំពុងមានភាពតានតឹងដាក់គ្នាកន្លងមក៕