កាណាដាៈ ថ្មីនេះៗមានបុរសម្នាក់ នៅប្រទេសកាណាដា ត្រូវបានបាត់បង់ជីវិត ដោយសារតែការឆ្លងមេរោគ ដ៏ធ្ងន់ធ្ងរ ក្រោយពីត្រូវសត្វឆ្មាមួយក្បាលបានខាំ។ នេះបើយោងតាមរយៈ សារព័ត៌មានខេញ ១៤ វៀតណាម ចេញផ្សាយនៅថ្ងៃទី៤ ខែកក្កដា ឆ្នាំ២០១៦។

ករណីកម្រនៃការស្លាប់ ដោយសារការរងរបួសពីឆ្មាខាំ ត្រូវបានកត់ត្រាទុកក្នុងកាសែត journal of Clinical Cases World ។ ផ្អែកតាមរបាយការណ៍ បុរសម្នាក់នោះមានអាយុ ៦៨ ឆ្នាំ បានដួលសន្លប់នៅក្នុងផ្ទះ និងបានស្លាប់ ក្រោយពេលដែលបញ្ជូនទៅកាន់មន្ទីរពេទ្យ។

កាលពីពីរសប្តាហ៍មុនបុរសម្នាក់នេះ មានរោគសញ្ញាមិនប្រក្រតី រួមមានឈឺពោះ ភាពទន់ខ្សោយ និងស្រក់ទម្ងន់ជាង ១០ គីទ្បូក្រាម ដោយមិនដឹកមូលហេតុ។

ទោះជាយ៉ាងណាស បន្ទាប់ពីលោកវេជ្ជបណ្ឌិតនៅមន្ទីរពេទ្យ ធ្វើការស៊ើបអង្កេត និងកំណត់មូលហេតុ បានបញ្ជាក់ឲ្យដឹងថា សរសៃឈាមរបស់បុរសម្នាក់នេះ ត្រូវបានប៉ោង និងបែក ដោយសារការឆ្លងរោគ Pasteurella multocida ដែលវាជាបាក់តេរី ត្រូវបានគេរកឃើញនៅក្នុងមាត់សត្វដូចជា ឆ្កែ និងឆ្មាជាដើម៕