កាប៊ុលៈ បើតាមអ្នកនាំពាក្យក្រសួងសុខភាពសាធារណៈគឺលោក អ៊ីស្មាអែល កាវូស៊ី បាននិយាយថា មនុស្សរហូតដល់ ២៤នាក់បានស្លាប់ និង៩១នាក់ផ្សេងទៀតរបួស នៅក្នុងហេតុការណ៍បំផ្ទុះគ្រាប់បែកពីរដងជាប់គ្នា នៅជិតក្រសួងការពារជាតិរបស់អាហ្វហ្គានីស្ថាន នៅថ្ងៃចន្ទនេះ។

ទីភ្នាក់ងារព័ត៌មានចិន ស៊ិនហួ ចេញផ្សាយនៅរាត្រីថ្ងៃចន្ទ ទី០៥ ខែកញ្ញា ឆ្នាំ២០១៦ បានឲ្យដឹងថា ផ្អែកលើព័ត៌មានថ្មីបំផុតដែលប្រមូលបានពីមន្ទីរពេទ្យ គឺមានជនរងគ្រោះសរុប ២៤នាក់បានស្លាប់ ក្នងនោះមានទាំងជនស៊ីវិល និងបុគ្គលិកសន្តិសុខ និង៩១នាក់ផ្សេងទៀតរបួស នៅក្នុងហេតុការណ៍បំផ្ទុះពីរដង នៅជិតក្រសួងការពារជាតិអាហ្វហ្គានីស្ថាននោះ។

បើតាមសាក្សីឃើញផ្ទាល់ភ្នែកបាននិយាយថា ការបំផ្ទុះនេះបានកើតឡើងកាលពីវេលាម៉ោង ៣ និង៣០នាទីរសៀល ម៉ោងក្នុងតំបន់ នៅពេលដែលបុគ្គលិកក្រសួងចាកចេញតាមទ្វារ បន្ទាប់បញ្ចប់ការងារ៕