សារ៉ាយ សក្ខណា...

សារ៉ាយ សក្ខណា ចុះពីអាមេរិកយប់មិញ

ចែកចាយបន្ត

នៅវេលាម៉ោង១០ និង៣០នាទីយប់ថ្ងៃទី២៤ វិច្ឆិកា យប់មិញ តារាសម្ដែងអ្នកនាងសារ៉ាយ សក្ខណា បានចុះមកដល់ប្រទេសកម្ពុជាទៀតហើយ បន្ទាប់អ្នកនាងបានឡើងទៅកាន់សហរដ្ឋអាមេរិកជាផ្ទះកំណើតរបស់ស្វាមីបានមួយរយៈពេលខ្លី។ ដំណើរមកដល់របស់អ្នកនាងត្រូវគេឃើញមានការស្វាគមន៍ពីតារាសិល្បៈច្រើននាក់ បើទោះជាងនាងចុះពីលើយន្តហោះនៅអំឡុងពេលយប់ជ្រៅ។

កញ្ញា រក្សា ហៅចែចូចូ ដែលជាតារាសម្ដែងភេទទី៣ និងជាតារាមួយរូបទៅទទួលអ្នកនាងដល់ព្រលានយន្តហោះដោយផ្ទាល់បានថ្លែងប្រាប់ Postnews ថា អ្នកនាងសារ៉ាយ សក្ខណា ទម្រាំតែបានចេញផុតពីព្រលានយន្តហោះ គឺរហូតដល់ម៉ោង១១យប់ឯណោះ។ តែក្រុមគ្រួសារ និងតារាសិល្បៈរួមមានកញ្ញា កញ្ញានី មុន្នីនាថ លោកសុធារ៉ា កញ្ញាដួង ម៉ានិច និងតារាមួយចំនួនទៀតនៅតែរង់ចាំដំណើរមកដល់របស់អ្នកនាងដោយភាពរីករាយ។

អ្នកនាង និងក្រុមអ្នកសា្វគមន៍បានទាំងបន្តដំណើរជប់លៀងជុំគ្នាយ៉ាងសប្បាយរីករាយនៅកណ្ដាលអាធ្រាត្រនោះផង។ កញ្ញា រក្សា ហៅចែចូចូ បន្ថែមថា អ្នកនាងសារ៉ាយ សក្ខណា មានគម្រោងមកលេងប្រទេសកម្ពុជាចំនួន៣ខែទើបត្រលប់ទៅវិញ ដោយអ្នកនាងនឹងទទួលថតកុនផង និងចុះមកមើលហាងថែរក្សាសម្ផស្សរបស់អ្នកនាងផង។ កញ្ញាថាស្វាមីរបស់អ្នកនាងសារ៉ាយ សក្ខណា បានចុះមកដល់កម្ពុជាតាំងពីច្រើនថ្ងៃមុនទើបអ្នកនាងសារ៉ាយ សក្ខណាត្រូវចុះមកស្រុកខ្មែរតែម្នាក់ឯងប៉ុណ្ណោះកាលពីហប់មិញ ហើយស្វាមីរបស់អ្នកនាង ជាអ្នកមកទទួលទៅវិញ អមដំណើរដោយក្រុមគ្រួសារ និងតារាសិល្បៈ។ កញ្ញានិយាយថា«ប្ដីគាត់ចុះមកមើលហាងតាំងពីមុនគាត់ម៉្លេះ ទើបសក្ខណា គាត់មកតែម្នាក់ឯងទេ យប់មិញហ្នឹង!»។

អ្នកនាំពាក្យដដែលបានអះអាងថាអ្នកនាងសារ៉ាយ សក្ខណា នឹងគ្រោងទទួលថតភាពយន្តភ្លាមៗ ដោយតាមការអះអាងគឺមានផលិតករមួយចំនួនទាក់ទងឲ្យអ្នកនាងធ្វើតួឯកហើយ ដោយអ្នកនាងក៍ទទួលយក។ ចែចូចូបន្តថា ក្នុងអំឡុង៣ខែដែលសារ៉ាយ សក្ខណា ចុះមកកម្ពុជាគឺអ្នកនាងនឹងអាចទទួលសម្ដែងច្រើនរឿង ដោយសារតែមានរយៈពេលយូរគួរសម៕
saray-sakana-1

saray-sakana-2

saray-sakana-3

saray-sakana-4

saray-sakana-5

saray-sakana-6

saray-sakana-7

saray-sakana-8

saray-sakana-9

saray-sakana-10

ចែកចាយបន្ត