ផលិតករ ប្រាប់...

ផលិតករ ប្រាប់មូលហេតុផលិតរឿង«វិកលចរឹត»

ចែកចាយបន្ត

ក្នុងពិធីបើកសម្ពោធដាក់បញ្ចាំងកាលពីយប់ថ្ងៃទី២៨ វិច្ឆិកា នៅផ្សារទំនើបអ៊ីអន ផលិតករខ្សែភាពយន្តរឿង«វិកលចរឹត» បានបង្ហាញការរំពឹងទុកយ៉ាងខ្លាំងថារឿងមួយនេះនឹងទទួលជោគជ័យ ដោយផ្នែកលើភាពភ័យរន្ធត់តាំងពីដើមរហូតដប់បញ្ចប់រឿង ដោយផ្នែកលើសាច់រឿង និងប្លង់។

ជាមួយនឹងការងឿងឆ្ងល់ពាក់ព័ន្ធនឹងចំណងជើងរឿង ផលិតករក៏បានធ្វើការពន្យល់ និងបង្ហាញពីមូលហេតុដែលនាំឲ្យមានការបោះទុនផលិតរឿងនេះឡើងផងដែរ។

លោកហ៊ុយ យ៉ាងឡេង ចាងហ្វាងផលិតកម្មមាតុចក្រភាពយន្ត បានអះអាងថាហេតុផលដែលលោកសម្រេចចិត្តផលិតរឿង«វិកលចរឹត»គឺដោយសារតែលោកបានកត់សម្គាល់ពីជីវិតរបស់ជនវិកលចរឹតម្នាក់ ហើយលោកយល់ថាខ្សែជិវិតរបស់បុគ្គលនោះបើយកមកកែច្នៃមកផលិតជាសាច់រឿងគឺពិតជាទាក់ភ្នែក។ គាប់ជួនលោកមានបំណងចង់ធ្វើរឿងឲ្យប្លែក កុំឲ្យច្រំដែលតែរឿងខ្មោច និងកំប្លែងនោះផង ទើបសម្រេចផលិតរឿងពិតរបស់ជនវិកលចរឹតនេះឡើយ ហើយយកមកថែមថយសាច់រឿងឲ្យមានរស់រវើក និងឲ្យមានលក្ខណៈជាប្រភេទរឿងអាថ៌កំបាំង និងភ័យរន្ធត់។

លោកថានៅក្នុងរឿងនេះលោកសម្រេចចិត្តសម្ដែងខ្លួនឯង ដោយសារតែលោកពិបាករកតួដែលអាចដាក់អារម្មណ៍ឲ្យដូចជាមនុស្សវិកលចរឹតតាមការស្រម៉ៃរបស់ខ្លួន។ ម្យ៉ាងមកពីលោកក៏មានទេពកោសល្យផ្នែកសិល្បៈ និងធ្លាប់ប្រឡូកការសម្ដែងជាយូរមកហើយផង ទើបលោកសម្រេចចិត្តសម្ដែងជាតួមនុស្សវិកលចរឹតនៅក្នុងផ្ទៃរឿង។

លោកថារឿងនេះលោកចំណាយមិនច្រើនម៉ឺនដុល្លារនោះទេ ប៉ុន្តែសម្រាប់គុណភាពលោកថាបានទទួលស្គាល់ពីខាងនាយកដ្ឋានភាពយន្តនៅកម្ពុជា និងអ្នកជំនាញភាពយន្តនៅបរទេស។ លោកថារឿង«វិកលចរឹត!» នឹងក្លាយជារឿងដែលមានលក្ខណៈខុសប្លែក ហើយក៏នឹងត្រូវនាំចេញយកទៅបញ្ចាំងនៅក្នុងតំបន់អាស៊ានដូចជាឡាវ ម៉ាឡេ និងប្រទេសមួយចំនួនផងដែរ។ លោកថារឿងនឹងដាក់បញ្ចាំងគ្រប់រោងចាប់ពីថ្ងៃទី២ ធ្នូខាងមុខ ដោយក្នុងពេលបន្តបន្ទាប់ក៏នឹងត្រូវត្រៀមខ្លួននាំចេញទៅបង្ហាញខ្លួននៅតាមរោងកុនទំនើបៗនៅតាមបណ្ដាប្រទេសអាស៊ានផងដែរ។

លោកស៊ិន ច័ន្ទសាយ៉ា ប្រធាននាយកដ្ឋានភាពយន្តប្រចាំក្រសួងវប្បធម៌ និងវិចិត្រសិល្បៈ បានអះអាងថានេះជារឿងខ្មែរដំបូងដែលលោកយល់ថាផលិតករខ្មែរអាចយកជីវិតពិតនៅក្នុងសង្គម មកច្នៃជារឿងភ័យរន្ធត់តាំងពីដើមដល់ចប់។ លោកថារឿងនេះបើនិយាយពីប្លង់ សំឡេង និងបារ៉ូលគឺល្អឥតខ្ចោះ ហើយលោកទទូចឲ្យផលិតករផ្សេងទៀតផលិតរឿងដែលមានលក្ខណៈបែបនេះឲ្យបានកាន់តែច្រើនដើម្បីលើកកម្ពស់វិស័យភាពយន្តខ្មែរ។

លោកថាដោយសាររឿងនេះមានឈុតឆាកល្អ និងរស់រវើក ទើបសូម្បីតែក្នុងពិធីបើកសម្ពោធក៏មានតារា និងមហាជនកុះករគាំទ្រ។ លោកទទូចឲ្យទស្សនិកជនខ្មែរ គាំទ្រខ្សែរឿង«វិកលចរឹត»ដើម្បីជំរុញទឹកចិត្តឲ្យផលិតករងាកពីការផលិតរឿងបែបកំប្លែង និងរឿងខ្មោចដែលមានលក្ខណៈច្រំដែល ឲ្យទៅជារឿងប្រភេទប្លែកនេះវិញ៕
ទស្សនាវីដេអូឃ្លិបដូចខាងក្រោមនេះ៖

huy-yaleang-1

huy-yaleang-2

huy-yaleang-3

huy-yaleang-4

huy-yaleang-5

huy-yaleang-6

huy-yaleang-7

ចែកចាយបន្ត