មានការភ្ញាក់ផ្អើលយ៉ាងខ្លាំង បន្ទាប់ពីលោកហ៊ុយ យ៉ាងឡេង ផលិតកររឿង«វិកលចរិត»ប្រកាសថាខ្លួន នឹងអត់លទ្ធភាពសងបំណុល បើថវិកាដែលខ្ចីគេយកមកផលិតរឿង មិនត្រូវបានដើមត្រលប់មកវិញ។ នៅលើហ្វេសប៊ុកគេឃើញប្រធានបទខាតដើម និងបញ្ហាជាប់បំណុលរបស់ផលិតកររឿងនេះ ដុតរោលអារម្មណ៍មហាជន ជាពិសេសគឺតារាសិល្បៈយ៉ាងខ្លាំង ខណៈដែលក្រុមអ្នកលេងហ្វេសប៊ុក បានបង្ហោះស្នើឲ្យគាំទ្ររឿង«វិកលចរិត»យ៉ាងចម្លែក ដើម្បីឲ្យជួយសង្គ្រោះផលិតករ។
នៅលើហ្វេសប៊ុកតាំងពីរសៀលថ្ងៃ៧ ធ្នូ គេឃើញមានការបង្ហោះបំផុសឲ្យជួយគាំទ្រ ដល់រឿង«វិកលចរិត»យ៉ាងខ្លាំង អមដោយសំណេរហួសចិត្ត ដែលរឿងមានគុណភាពមួយនេះ មិនសូវមានអ្នកទិញសំបុត្រ ចូលទស្សនាហើយបណ្ដាលឲ្យផលិតករ ប្រឈមវ័ណ្ឌករបំណុលច្រើនម៉ឺនដុល្លារ ដោយសារតែខ្ចីគេយកមកផលិតរឿង។ ផលិតករបានអះអាងថាដើមទុនផលិតរឿង«វិកលចរិត»គឺ៤៥០០០ដុល្លារ ជាថវិកាលក់របស់ទ្រព្យ និងខ្ចីបុលគេដោយសារតែ ស្រឡាញ់វិស័យផលិតកុនពេក។ ក្រោយស្ថានភាពភ្ញាក់ផ្អើលពេល ក្នុងហ្វេសប៊ុកគេឃើញអ្នកទស្សនា មានចំនួនកើនឡើងនៅតាមរោងកុន ដែលធ្វើឲ្យផលិតករ មានកម្លាំងចិត្តជាងមុន បើទោះស្ថិតិអ្នកចូលទស្សនា នៅតិចជាងរឿង«កំណត់ហេតុនាងនាថ»នៅឡើយ។
លោកហ៊ុយ យ៉ាងឡេង សារភាពថាក្រោយមានការភ្ញាក់ផ្អើល លោកកត់សម្គាល់ថាខ្សែរឿង«វិកលចរិត»មានអ្នកទស្សនាជាងមុន ខណៈដែលខាងម្ចាស់រោង ក៏ប្រកាសថានឹងផ្ដល់ឱកាសឲ្យរឿងរបស់លោកដាក់បញ្ចាំងដល់ថ្ងៃអាទិត្យ ដើម្បីឲ្យលោកមានឱកាសស្រង់ដើម ដែលសុទ្ធតែជាប្រាក់បំណុលយកមកផលិតរឿង។ លោកមានការរំពឹងជាងមុនថា ទម្រាំតែដល់ថ្ងៃអាទិត្យ គឺដើមទុន៤៥០០០ដុល្លារ ដែលបានចំណាយថតនឹង ស្រោចស្រង់បានច្រើន បើទោះមិនទាន់រំពឹងថារួចខ្លួន ឬចំណេញ។ លោកទទូចឲ្យគាំទ្ររឿង ដែលមានរសជាតិភ័យរន្ធត់ និងបែបអាថ៌កំបាំងនេះ ដោយសារតែលោកបញ្ជាក់ថា នេះជារឿងដែលផលិតឡើងដើម្បីប្រកួតប្រជែងទីផ្សារភាពយន្ត ប៉ុន្តែបែរជាមិនសូវទទួលការចាប់អារម្មណ៍ ពីក្រុមយុវវ័យ មុនពេលមានការទទូចពីអ្នកលេងហ្វេសប៊ុក។ លោកថាបើរឿងនេះបានដើមនោះ លោកនឹងរួចបំណុលបានច្រើន តែបើខាតគឺបំណុលទាំងថ្លៃផលិតរឿង និងថ្លៃខ្ចីរបស់គេទិញសម្ភារៈថតកុនយកមក គឺពិតជាគ្មានលទ្ធភាពដោះរួច។
ក្រុមតារាសិល្បៈ និងផលិតករច្រើនឡើង បានទទូចឲ្យជួយគាំទ្ររឿងនេះ ពីសំណាក់មហាជន ខណៈដែលក្រុមតារាមួយ ក្រុមក៏ត្រូវគេឃើញដាក់វេណគ្នាទៅគាំទ្រ និងបំផុសឲ្យជួយគាំទ្រ៕
