Post News Media ព័ត៌មានសិល្បៈ និងកម្សាន្ត តារាល្បី៤រូប ...

តារាល្បី៤រូប លើកពីប្លង់ពិបាកបំផុត៤ឈុតក្នុងរឿង«ស្វ័យគុណ៤»

ចែកចាយបន្ត

ក្នុងពិធីសម្ពោធរឿង«ស្នេហ៍ស្វ័យគុណ៤»កាលពីយប់ថ្ងៃទី១១ មករា នៅផ្សារទំនើបអ៊ីអន តារាល្បីៗ៤រូប ដែលត្រូវគេស្គាល់ថាជាតួអង្គសំខាន់ប៉ុនគ្នាក្នុងរឿង សុទ្ធតែបានលើកឡើងពី ផលវិបាកដោយឡែកពីគ្នា លាតត្រដាងឲ្យមហាជនបានដឹង។ នេះជាខ្សែភាពយន្តខ្នាតធំ ដែលផលិតឡើងដោយផលិតកររឿង «ស្នេហ៍៩» និង«ឡូយ៩» ដែលមានការទទួលស្គាល់ស្នាដៃជាយូរមកហើយ ដោយថ្ងៃកំណត់លក់សំបុត្រផ្លូវការនៅថ្ងៃទី១៩ មករាខាងមុខ ក៏ត្រូវបានរំពឹងថាកន្ទ្រាក់យុវវ័យភាគច្រើនផងដែរ។

កញ្ញាឌុច លីដា និយាយថាឈុតក្នុងរឿង«ស្នេហ៍ស្វ័យគុណ៤» ដែលពិបាកសម្រាប់នាង គឺត្រង់ឈុតតម្រូវឲ្យនាងតែងតួជានាងអប្សរា។ នាងថាឈុតនោះគឺតម្រូវឲ្យនាង ទូលម្កុដមានទម្ងន់ធ្ងន់ពិបាកទ្រាំ ហើយក៏ជាឈុតដែលខាងផលិតករ តម្រូវឲ្យនាងត្រូវចំហរល្វែងលើ តាមលំនាំនាងអប្សរាពិតៗនៅលើជញ្ចាំងប្រាសាទផងដែរ។ យ៉ាងណាមិញ ថាការពិតខ្លួនមិនបានដោះអាវពិតៗនោះទេ គឺខាងផលិតករមានបច្ចេកទេស ឲ្យនាងពាក់អាវពណ៌សាច់។ នាងថានោះជាឈុតពិបាកជាងគេក្នុងរឿង ជាពិសេសគឺការធ្វើអារម្មណ៍ទម្រាំតែត្រូវ។

រាជនីក្រមា កញ្ញាមាន សូនីតា ដែលតួអង្គធំម្នាក់ដែរ បានអះអាងថានាងលំបាកជាងគេត្រង់ឈុតអង្គុយហាលភ្លៀង នៅកណ្ដាលមាត់សមុទ្រ។ ឈុតនោះតម្រូវឲ្យនាងអង្គុយក្រោមដំណក់ភ្លៀង ដោយទម្រាំថតត្រូវគឺរងារចង់រឹងខ្លួន។ ក្នុងនោះក្រុមការងារដែលលិបក្នុងសមុទ្របាញ់ទឹកធ្វើភ្លៀងសុប្បនិមិត្តក៏រឹតតែពិបាកផងដែរ ទម្រាំតែបានថតចប់។ យ៉ាងណាមិញ នាងថានេះជាឈុតដែលនាងពេញចិត្តជាងគេក្នុងរឿង«ស្នេហ៍ស្វ័យគុណ៤»ដែលនាងបានសម្ដែង។

កញ្ញា ចាន់ ស្រីរ័ត្ន ដែលជាតួឯកម្នាក់ដែរក្នុងរឿង«ស្នេហ៍ស្វ័យគុណ៤»បានអះអាងថាឈុតដែលនាងពិបាកសម្ដែងជាងគេគឺឈុតចោរច្រានទម្លាក់ទឹក ហើយជាឈុតដែលតម្រូវឲ្យនាង និងតួប្រុសជាស្វាមីក្នុងរឿងសម្ដែងក្នុងទឹក ដើម្បីឲ្យមានភាពរ៉ូម៉ាទិក។ នាងថាមួយឈុតនេះទម្រាំថតចប់ នាងសឹងប្ដូរជីវិត ដោយសារតែត្រូវលឹបទឹកយូរទម្រាំ អាចហើបលើទឹកបាន ហើយក៏ជាឈុតត្រូវថតពេលយប់ដែលធ្វើឲ្យនាងរងារផង ខ្លាចផងនោះដែរ។

មិនខុសគ្នាដែរ តួឯកស្រីម្នាក់ទៀតក្នុងរឿងមួយនេះ គឺអ្នកនាងប៊ីរីយ៉ា ក៏ទម្លាយឲ្យដឹងពីឈុតពិបាកដែលនាងបានសម្ដែងផងដែរ។ ប៉ុន្តែប្លង់របស់នាងមិនប្រឈមគ្រោះថ្នាក់ ជាឈុតមានការប្រឈមដូចតួ៣រូបខាងលើនោះទេ តែជាឈុតដែលតម្រូវឲ្យតួប្រុសអោបថើបៗ ដើម្បីឲ្យដូចជាប្ដីប្រពន្ធក្រៅឆាកពិតៗ។ នាងថាច្រើនប្លង់ក្នុងរឿង«ស្នេហ៍ស្វ័យគុណ៤» នាងត្រូវលះបង់ថ្ពាល់ និងរាងកាយឲ្យតួអង្គជាស្វាមី អោបរឹតៗភាគច្រើន ដើម្បីបង្ហាញពីសកម្មភាពស្អិតរមួតរវាងប្ដី និងប្រពន្ធ។ នាងថាជាការសំណាងដែរស្វាមីរបស់នាង ជាមនុស្សយល់ខ្ពស់ពីសិល្ប: ហើយមិនចេះប្រច័ណ្ឌកុំអី ពិតជាមិនអាចសម្ដែងបាន។

តំណាងក្រុមហ៊ុនពូព្រហ្ម ដែលជាអ្នកចែកចាយរឿងនេះ បានអះអាងថាក្រោយការធ្វើពិធីសម្ពោធ គឺរឿង«ស្នេហ៍ស្វ័យគុណ៤»​ រង់ចាំរហូតដល់ថ្ងៃ១៩ មករា ទើបសម្រេចដាក់បញ្ចាំង ដើម្បីកុំឲ្យជាន់រឿងបរទេស ដែលបានទម្លាក់ចូល។ លោកថាការបើកសម្ពោធរឿងពីចម្ងាយក៏ជាយុទ្ធសាស្រ្តមួយ របស់ពូព្រហ្មដើម្បីឲ្យមហាជនបានដឹងបានឮ ហើយមានការត្រៀមទុក បានស្រួលផងដែរ៕